28 июня 2008 г.
Вăрнарта пурăнакан С.Фоминов саккунпа туслă пулман, пĕр хутчен мар тĕрлĕ преступленисемшĕн суд тенкелĕ çине ларнă. Черетлĕ айăплав вăхăтне тултарса пĕлтĕрхи октябрь пуçламăшĕнче кăна-ха ирĕке тухнă вăл, уйăх вĕçĕнче каллех йĕрке хуралçисен аллине лекнĕ. Хальхинче преступник-рецидивист хулиганла ĕç тунă: обществăри йĕркелĕхе сĕмсĕррĕн пăснă, çынна çĕçĕпе чикнĕ. Ку ĕç-пуç Вăрнар райповĕн «Дежурный» лавкки çывăхĕнче пĕлтĕрхи октябрĕн 29-мĕшĕнче пулса иртнĕ.
А.Терентьев 21 сехет тĕлĕнче «Снежана» лавкка патĕнче кумне тĕл пулнă, çакна паллă тума бильярд залне кĕрсе тухма шутланă. Кунта кăшт ларкаланă хыççăн, сĕм каç пулса кайнă тесе, арçын килелле тухса утнă. Анчах киле тĕрĕс-тĕкел çитеймен вăл, больницăна лекнĕ. Шăпах та çÿлерех асăннă С.Фоминов айăпĕпе.
«Дежурный» лавккапа юнашар чип-чипер пыракан А.Терентьев çулне çÿллĕ арçын пÿлнĕ, унран сигарет пуррипе-çуккине ыйтнă. Ку, ăнлантăр ĕнтĕ, С.Фоминов пулнă. Ÿсĕр çынна тарăхса кайма нумай кирлĕ-и – чăрсăр арçынна А.Терентьевăн хуравĕ – сигарет çук тени – пачах та килĕшмен. Вăл ним айăпсăр çынна усал сăмахсемпе хăртса пĕтернĕ, аллипе сулкалашма пуçланă. Çав вăхăтра А.Терентьев сулахай айăкĕ пĕçерсе кайнине сиснĕ, хăйне çĕçĕпе чикнине туйса илнĕ. Каярахпа шутланă тăрăх, А.Терентьевăн куртки çинче çĕçĕпе каснă 20 вырăн пулнă. Хĕнекен алăсенчен май килнĕ таран хÿтĕленме тăрăшнă вăл.
Телее, А.Терентьевăн кумĕ В.Лукин та бильярд залĕнче ытлашши тытăнса тăман. Кумĕ инкеке лекнине асăрхасанах вырăна хăвăрт çитсе тăнă, унăн сывлăхне сиен кÿнĕ арçынна милици сотрудникĕсемпе пĕрле тытса чарма пултарнă.
Суд ларăвĕнче С.Фоминов хăйĕн айăпне ют çынсем çине йăвантарма пăхнă. Çак каç бильярд залĕнчен тухнăскер, вăл такамсем хытă кăшкăрнине илтнĕ иккен. «Палламан çынсем иккĕн пĕччен арçынна хĕненине курах кайрăм. Эпĕ чупса çитнĕ çĕре вĕсенчен пĕри хăраса тарма ĕлкĕрчĕ. Теприне çĕрте выртакан çумĕнчен сирсе петĕм. Çав вăхăтрах хама такам пуçран янлаттарчĕ», – тенĕ вăл судра. Анчах унăн суйи пурпĕрех тăрă шыв çине тухнă. Экспертиза çĕçĕ аври çинче те С.Фоминовăн тар паллисем пуррине палăртнă.
Çапла майпа йĕплĕ карта леш енне ярассинчен хăтăлма тăрăшнă пулин те, нимĕн те тухман унăн. Суд йышăнăвĕпе С.Фоминова çирĕп режимлă колоние 3 çуллăха юсанма ăсатнă. А.Терентьевăн пит-куçне те, кĕлеткине те тĕрлĕ çĕртрен амантнăран больницăра сипленме тивнĕ. Ăна сиплеме тăкакланă 14333 тенкĕ те 51 пуса та С.Фоминоваран шыраса илмелле тесе палăртнă.