26 июня 2008 г.
ÇĔРТМЕ уйăхĕн 19-20-мĕшĕсенче Шупашкарти «Mega Galaxy» культура-кану центрĕнче Раççейĕн «Раççей инвестицине – Раççей капиталĕ» пĕрремĕш форумĕ ĕçленĕ. Ăна Раççей Президенчĕн Атăлçи округĕнчи полномочиллĕ представительствин тата Чăваш ен Правительствин пуçарăвĕпе тата пулăшăвĕпе йĕркеленĕ. Унăн тĕллевĕ – Раççей Федерацийĕн регионĕсене инноваци, наука енчен, пысăк технологисен рынокне аталантарма, экологи тĕлĕшĕнчи лару-тăрăва лайăхлатма пулăшасси. Пысăк форума 22 регионтан тата хăшпĕр ют çĕршывран 700 яхăн çын хутшăннă, пурĕ 500 проекта яхăн тăратнă.
Мероприятие савăнăçлă лару-тăрура уçма РФ Президенчĕн Атăлçи округĕнчи полномочиллĕ представителĕ Григорий Рапота, Чăваш ен Президенчĕ Николай Федоров, РФ Суту-илÿпе промышленноç палатин вице-президенчĕ Иван Гореловский тата ытти пысăк хăнасем килнĕ.
ÇĔРТМЕ уйăхĕн 20–24-мĕшĕсенче Шупашкарта «Экспо-контур» курав комплексĕн территорийĕнче «Регионсем – пĕр-пĕринпе килĕштерсе ĕçлесси» регионсем хушшинчи XI курав ĕçленĕ. Унта Чăваш Республикин тата Раççейри регионсен халăх хуçалăхĕн мĕнпур отраслĕнчи 200 ытла предприятипе организаци хутшăннă. Вĕсем хушшинче çулсеренех хăйсем хальхи вăхăтри технологипе тата çĕнĕ продукципе паллаштаракан «Элара», «АВС Холдинг», «Акконд» тата ыттисем пур. Тĕслĕхрен, «Элара» стенчĕ çинче электропоезд машинисчĕн имитациленĕ кабини тĕп экспонат шутланать.
РЕСПУБЛИКА кунне уявламашкăн Чăваш ене Раççей Промышленниксемпе предпринимательсен союзĕн президенчĕ Александр Шохин, Хорвати Республикин Раççей Федерацийĕнчи чрезвычайлă тата полномочиллĕ посолĕ Божо Ковачевич, Намиби Республикин РФ Чрезвычайлă тата полномочиллĕ посолĕ Самуэль Кавето Мбамбо, Польша Республикин РФ Чрезвычайлă тата полномочиллĕ посолĕ Ежи Бар господинсем, çавăн пекех Раççей телекуравĕн академийĕн президенчĕ Владимир Познер, Атăлçири хуласен ассоциацийĕн членĕсем – хуласен пуçлăхĕсем тата ыттисем килнĕ. Чăваш ен Президенчĕ Николай Федоров вĕсемпе калаçнă май икĕ еншĕн тупăшлă никĕс çинче тачă çыхăну тытса ĕçлес, экономика тата культура çыхăнăвĕсене çирĕплетес ыйтусене сÿтсе явнă.
РАÇÇЕЙ мухтавĕпе чапне çĕклеме пулăшакан тава тивĕçлĕ пысăк ĕçсемшĕн Чăваш Республики Аслă Петĕр орденне тивĕçрĕ. Çак йышăнăва кăçалхи çу уйăхĕн 29-мĕшĕнче Раççейĕн Аслă Петĕр ячĕллĕ наци наградисене парас енĕпе ĕçлекен общество комиссийĕн ларăвĕнче тунă. Наградăна Республика кунĕ умĕн Шупашкарта иртнĕ «Управлени. Экономика. Аталану» экономика форумĕнче Чăваш ен Президентне Николай Федорова Раççей Промышленниксемпе предпринимательсен союзĕн президенчĕ Александр Шохин панă.
ÇĔРТМЕ уйăхĕн 21-мĕшĕнче наци библиотекин пирвайхи реконструкцийĕн презентацийĕ иртнĕ. Унта ЧР Президенчĕ Николай Федоров, ЧР культура министрĕ Роза Лизакова тата ыт. официаллă çынсем хутшăннă. Наци библиотекинче электрон вулав залĕ, Интернет-зал, право информаци центрĕ пур. Вăл Б.Н.Ельцин ячĕллĕ Президент библиотекин федерацин Атăлçи округĕн представителĕ пулма хатĕррине палăртнă.