26 июня 2008 г.

Виçĕ çул каялла пĕтĕм чăваш халăхне пĕрлештерекен уява – Республика кунне – Вăрнарта чаплăн ирттернĕччĕ. Кăçал уяв хăни-вĕрлине тĕп хуламăрпа пĕрле Муркашпа Йĕпреç районĕсем йышăнчĕç.
Кÿршĕллĕ Йĕпреç районĕнче икĕ куна тăсăлнă уяв мероприятийĕсем нумайлăха асра юлĕç. Çĕнелсе капăрланса, хăтлăланса кайнă район çак кунсенче социаллă çĕнĕ объектсемпе тата пуянланчĕ. Вĕсене сумлă хăнасем – Чăваш ен Президенчĕ Н.Федоров, Раççей Патшалăх Думин депутачĕсем Н.Бударинпа П.Семенов, Ханты-Манси автономи округĕнчи Нефтеюганск хула пуçлăхĕ В.Семенов, Президент Администрацийĕн ертÿçи А.Шарапов, Раççей Геройĕ Н.Гаврилов, çĕршывĕпе паллă телеертÿçĕ Л.Якубович – хутшăннипе савăнăçлă лару-тăрура уçрĕç. Миллиард ытла тенкĕ хывнă объектсен шутĕнче – Аниш – Савкка – Çĕнĕ Кĕлĕмкасси автоçул, пахалăхлă шывпа тивĕçтерекен водовод, 31 хваттерлĕ пурăнмалли çурт, çĕнелнĕ чукун çул вокзалĕ, «Россельхозбанкăн» Чăваш енри представительствин офисĕ. Кунсăр пуçне поселокри Асăнупа Мухтав скверĕнче МИ-8 вертолет вырнаçтарнă. Президент çак вырăн çамрăксене патриотла воспитани парас ĕçе вăйлатассине сумлă тÿпе хывнине палăртрĕ.
Республика кунне халалланă уяв мероприятийĕсем пĕрремĕш кун Пучинке тăрăхĕнчи питĕ илемлĕ кĕтесре – Камай уйĕнче – иртрĕç. Йăлана кĕнĕ «Камай уйĕн урхамахĕсем» турнир кăçал юланутçăсене вунпĕрмĕш хут пуçтарчĕ. Кунтах республикăри ял поселенийĕсен иккĕмĕш спартакиади иртрĕ. Спортсменсен йышĕнче вăрнарсене курма питех кăмăллă пулчĕ. Район чысне Санарпуç ял поселенийĕн команди хÿтĕлерĕ. Вăрнар çамрăкĕсем – ирĕклĕ майпа кĕрешекенсем – кавир çине тухрĕç. «Август» фирмăн «Вăрнарти хутăш препаратсен завочĕ» филиалĕн директорĕн çумĕ Евгений Захаров вара ут таврашĕсене пĕлессипе палăрчĕ.
Раççей халăх артистки Надежда Бабкина йĕркелесе пынипе иртнĕ патриотла юрăсен «Раççей юррисем» фестивалĕ уяв сумне пушшех ÿстерчĕ. Паллă юрăçпа пĕрле уçланкăри сцена çинче хăйсен пултарулăхĕпе Бурят Республикинчи «Байкал наци юрă театрĕ, Çурçĕр Осетири «Ритмы гор», Саха-Якутири «Таймаада», Краснодарти казак юррисен «Гриница» ансамблĕсем, Екатерина Бродская, Андрей Хохловский паллă юрăçсем паллаштарчĕç.
Тепĕр кунне Йĕпреç поселокĕ халăх пултарулăхĕн «Раççей çăлкуçĕсем» XVI фестивалĕн хăнисене йышăнчĕ. Вунă сехет тĕлнелле тĕрлĕ тумлă, тĕрлĕ халăх юрриллĕ куçа илĕртекен колонна районти культура çуртĕнчен культурăпа кану паркне килсе çитрĕ. Сцена çине Армени, Карели, Мордови, Удмурти, Тутарстан, Краснодар крайĕн, Красноярск, Волгоград, Тверь облаçĕсен пултарулăх ушкăнĕсем тухрĕç. Вĕсене Йĕпреç, Элĕк, Вăрнар, Тăвай, Комсомольски районĕсен артисчĕсем улăштарчĕç. Хыççăн сценăна, МТС çыхăну операторĕ йĕркеленипе, республикăри паллă «Çăлкуç» тата «Çеçпĕл» ансамбльсем, «Нота j» ташă ушкăнĕ йышăнчĕç. Халăхсем хушшинчи туслăх çирĕпленсе пынине, нацисен культури çÿллĕрех шая çĕкленнине çирĕплетекен фестиваль юрри-кĕвви каçченех таврана саланчĕ.
Паркра кунĕпех ал ĕçĕсен куравĕ ĕçлерĕ, тĕрлĕ конкурссемпе ăмăртусем пычĕç. Вăрнар кĕрешÿçисем физкультурăпа спорт комплексĕнче вăй виçнĕ вăхăтра волейболистсем район ят-сумĕшĕн паркра тупăшрĕç. Пирĕн спортсменсем ултă командăран чи вăйлисем пулчĕç.
Юрă-кĕвĕ, вăйă-кулă, асамлă фейерверк... Асра юлмалли чылай. Çапах та тăван халăхăмăрăн кунран та пĕлтерĕшлĕрех пулăмпа мăнаçланмалли пур: уяв вăхăтĕнче ытти наци культурипе паллашнипе, регионсем хушшинчи ĕçлĕ çыхăнусене аталантарма, инвестицисене хамăр тăрăха явăçтарма май килнипе.