26 июня 2008 г.
Эпир ăна ялтилле – Валерий теме хăнăхнă. Официаллă мероприятисенче ашшĕ ячĕпе Валерьян Миронович тенĕ. Пирĕн çак çывăх юлташăмăрăн спортри малтан мала вĕçес çуначĕ 1964 çултан хăватлăн аталанса пычĕ. Çав çулхине ăна Вăрнар райĕçтăвкомĕн «Урожай» ирĕклĕ спорт обществин организацине ертсе пыма явăçтарчĕç. Çирĕм пиллĕкри йĕкĕт вĕренекен, ĕçлекен яш-кĕрĕм хушшинче ун чухнех паллă спортсмен шутланнă. Хĕлĕн-çăвĕнех тем тĕрлĕ ăмăртусем иртетчĕç. В.Миронов сĕннипе «Çĕнтерÿ çулĕ» парнисене çĕнсе илессишĕн çăмăл атлетсен, йĕлтĕрçĕсен ăмăртăвĕсене çуллен йĕркелеттĕмĕр. Хăй вара редакцинчен тухма та пĕлместчĕ, çырсах тăратчĕ. Комсомол райкомĕн пĕрремĕш секретарĕпе, пĕр ялта ÿснĕ Леонид Тянговпа туслăччĕ, райкомăн ирĕклĕ инструкторĕнче тăнă май, анлăрах мероприятисене пĕрле хатĕрлетчĕç. Спорт юхăмĕн районти ертÿçи хăйĕн организаторла пултарулăхне обществăлла организацисемпе тачă çыхăнса туптанă. Ун тавралла пĕр шухăшлă, пĕр тĕллевлĕ юлташĕсем пайтахчĕ.
Хăйне пÿрнĕ ĕçĕ-хĕлĕпе кăмăлĕн туртăмне кура Шупашкарта физкультура учителĕсен курсне пĕтерчĕ, Хусанта пединститутра аслă пĕлÿ туянчĕ. Пĕр вăхăт Çĕрпелти вăтам шкулта, Калининăри профтехучилищĕре ĕçлерĕ. Çирĕм çул хушши Вăрнарти ял хуçалăх техникумĕнче физвоспитани пуçлăхĕ пулчĕ. Вăл вĕрентнисем хушшинчен ятлă-сумлă спортсменсем – разрядниксем, мастерсем çĕршерĕн тухса пычĕç.
В.Миронова наградăланă грамотăсене, дипломсене, хаçатсенчи ун çинчен çырнă статьясене пăхса лартăмăр. Наградисем – комсомол райкомĕнчен, обкомĕнчен, райĕçтăвкомран, спорт обществисенчен, профсоюз обкомĕнчен, СССР спорт обществисен тĕп канашĕнчен, ЧР Министрсен Советĕнчен, РФ Ял хуçалăх министерствинчен, Совет Çарĕн командованийĕнчен – çĕр ытла шутларăмăр. Çĕнтерÿçĕн асăнмалăх хулисем: Шупашкар, Хусан, Орск, Фергана, Алма-Ата, Пятигорск, Ессентуки, Волгоград, Воронеж, Мускав – Совет Союзне анлăшпех çаврăннă теме пулать. Пăхăр-ха сăн ÿкерчĕке – медалĕсене шутласа кăларма пулĕ-ши;
Пысăк ăмăртусенче çĕр хутчен ытла çĕнтернĕ, хамăр республикăпа Раççей чысне хÿтĕленĕ. Хăй вăтăра пуснă çулхине СССР спорт мастерĕн ятне тивĕçнĕ (çăмăл атлетсем хушшинчен Вăрнар районĕнчен – пĕрремĕшĕ, чи пирвайхи).
Пĕтĕм Союзри ăмăртусенче 1000 метра 2 минут та 22 çеккунтра вирхĕнсе тухнă, çак дистанцире чи хаяр чупакансенчен Совет Союзĕнче тăваттăмĕшĕ пулса тăнă. 800, 1000, 1500, 3000 метрлă дистанцисенче нумай хутчен мала тухса çĕнтернĕ. 1964 çулта ялти йышлă спортсменсем хушшинче 1000 метра чупса финиша пуринчен малтан çитнĕ, Раççей чемпионĕн ятне çĕнсе илнĕ. Акă, хаçатсенчи хăшпĕр йĕркесем: «На дистанции 1500 м. чемпионом республики стал вурнарец В.Миронов» («Молодой коммунист», 1964, 12 апр.); «5000 метра чупнă 23 спортсмен йышĕнче дистанцие физкультура учителĕ В.Миронов пуринчен малтан вĕçлерĕ» («Коммунизм ялавĕ», 1968, майăн 25-мĕшĕ); «Августăн 6-мĕшĕнче Валерий Миронов Вильнюсран кĕмĕл тата бронза медальсемпе таврăнчĕ. Вăл унта 800 тата 1500 метра чупма Чăваш çĕршывĕнчен хăнана чĕннĕ майпа пĕчченех хутшăннă. Паян спортсмен Иваново хулине тухса каять» ( «Ç.ç.», 1968, августăн 10-мĕшĕ).
Валерьян Миронович, çĕршывăмăрăн çулăмлă патриочĕ, тăван районшăн çирĕм çул ытла чун хавалĕпе ĕçлерĕ. Ăна Балтика тăрăхĕнче те, Вăтам Азире те, Урал таврашĕнче те, Кавказ леш енче те «Чăвашах-и эс, кам эс, ăçтан эс;» – тесе тĕпчекенсем тĕл пулкаланă. «Вăрнартан эпĕ!» – тенĕ вăл, кăмăллăн кулкаласа.
– О-о-о! Унашкал çĕршыв та пур иккен! – тĕлĕннĕ катарисем.
Çуралнăранпа 70 çулĕ çитнĕ май, Валерьян Миронович çак кунсенче районăн чыслă-хисеплĕ кĕрекинче лармаллаччĕ. Водитель прави те пулман çĕртен руль умне ÿсĕрпе ларнă ăçтиçука пула кунçулĕ синкерлĕ татăлчĕ. Хĕрĕх çиччĕрех пирĕнтен сарăмсăр уйрăлса кайрĕ.
Çуралнă-ÿснĕ Кушикĕнче ун ячĕпе урам пур. Ял хуçалăх техникумĕ ăна астуса эстафетăллă ăмăртусем ирттерет. Физкультурăна вĕрентекенсем шкулсенче, училищĕре, техникумра «Миронов урокĕсене» ирттерсен, çакна йăлана кĕртсен аван пулĕччĕ. Кăмаш шкулĕнче, техникумра, Вăрнарта пирĕн алăра пур материалсемпе музейсене пуянлатма пулать. Пуçаруллă сĕнÿсем, тен, татах хушăнĕç;.. Манмастпăр сумлă ентеше.