19 июня 2008 г.
Июнь пуçламăшĕнче çанталăк хĕвеллĕ кунсемпе савăнтармарĕ те, Раççей уявĕ тĕлне сывлăш температури 20 градусран самаях çÿлерех улăхни пурин кăмăлне те хăпартрĕ. Шăрăх вара çынсене шыв хĕрнелле туртать – хĕвел çинче хĕртĕнсе выртни, шыва кĕрсе уçăлни мĕнле ырлăх вĕт. Паллах, сывлăшĕ те, шывĕ те ăшă пулсан...
Анчах аса илĕр-ха: чылай вăхăт çумăр çуса çĕре ислетрĕ, çанталăкĕ те нормăран ытлашшипех чакса сивĕ тăчĕ. Темле пулсан та, шыва кирлĕ пек ăшăнса çитме нимле те май пулмарĕ.
Шăп та çакă питĕ ултавлă: сывлăшра шăрăх, шывĕ вара сивĕ – çын организмне çакă сиенлĕ витĕм кÿрет.
Уяв кунĕсенчех, акă, районта шывра икĕ çын пурнăçĕ татăлнă: июнĕн 11-мĕшĕнче Уйкас Явăш ялĕнчи 30-ти И., июнĕн 13-ĕшĕнче Çĕн Сăрьелти 35-ри К. путса вилнĕ.