19 июня 2008 г.
Хутăш препаратсен завочĕн директорĕн çумĕ Е.Захаров, «Химик» суту-илÿ çурчĕ, «Сортсемовощ» пĕрлешÿ, Вăрнарти 1-мĕш шкул дирекцийĕ укçа-тенкĕпе пулăшман пулсан районти çамрăк шашка ăстисем Сочире иртнĕ Раççей финалне хутшăнаймасан та пултарнăччĕ. Спонсорсен пулăшăвĕ республика историйĕнчи пушă вырăна та «тултарма» май панă – çĕршыв ăмăртăвне Чăваш енрен шăпах 20 çул команда тăратман. Вăрнарти 1-мĕш вăтам шкулта вĕренекенсем вара çак чыса сумлă çĕнтерÿпе тивĕçрĕç.
Вунпĕр куна тăсăлнă турнирта вăрнарсен команди – вăл Майкл Петрова, Артем Максимова, Юрий Антонова, Ирина Иванована пĕрлештернĕ – призлă вырăна тухайман пулин те, ачасен ăс-тăн çивĕчлĕхĕ пирки хирĕçлеме çук. Пухăннă 39 командăран вĕсем вуннăшĕпе вылянă. Кемерово облаçĕнчи Прокопьевск, Белово хулисенчи, Кабардино Балкаринчи, Новоникольскинчи шкулсен командисене çĕнтернĕ, Челябинск, Астрахань, Оренбург облаçĕнчи командăсемпе партисем никам çĕнтерейменнипе вĕçленнĕ. Тăватă тĕл пулура, шел, очкосене çухатнă.
Григорий Иванович Степанов (командăна ăмăртăва вăл хатĕрленĕ) Сочине кайса килни çамрăксен выляс ăсталăхне ÿстерме май панине савăнăçлăн палăртрĕ. Сăлтавĕ те пур, турнира хутшăннă ачасенчен чылайăшĕ – спорт мастерĕн кандидачĕсем. Çивĕчлĕх шăпах çакăн чухне туптанать те.