04 июня 2008 г.
Вут-çулăм алхаснин сăлтавĕсене пĕлсен инкексене асăрхаттарма çăмăлрах. Çавăнпа та ятарлă службăсем организацисенче, учрежденисенче тата халăх хушшинче ăнлантару ĕçне ирттерессине вăйлатрĕç. Кăтартусене илес пулсан, пушарсен шучĕ пĕлтĕрхинчен 4 тĕслĕх чакрĕ пулин те районта лару-тăру пурпĕрех кăткăс. Юлашки уйăхсенче ачасен айăпĕпе тухнă инкексем нумайланчĕç. Çавăн пекех вут-çулăм алхаснин сăлтавĕсем: юсавсăр электричество приборĕсемпе тата килте хăйсем тунă хатĕрсемпе усă курни, кивелнĕ электропроводка. Кăмакана монтаж тунă тата усă курнă чух çирĕп йĕркесене пăснăран та 4 пушар çырăнчĕ.
«Çул çинче ÿсĕр çын – преступник, вăл пысăк хăрушлăх кăларса тăратать», – теттĕмĕр эпир. Çав вăхăтрах ÿсĕр çынсем электричествăпа, газ приборĕсемпе усă курни миçе инкекĕн сăлтавĕ пулман пулĕ; Эрех ĕçсе минренĕ çын алла чĕлĕм тытрĕ-тĕк, хăть хăш вăхăтра пушар кăларма пултарать...
Пушар хăрушсăрлăх йĕркине пăхăнасси – кашни çыннăн тивĕçĕ. Вĕсене сĕмсĕррĕн пăсакан та преступниках. Ытларах чухне вĕсем – çăмăлттай, яваплăха туйман çынсем, намăс сăмах пĕлтерĕшне те пĕлмеççĕ, кун пеккисене çын сăмахĕ те тивмест. Вĕсем çине кÿршĕсем те, вырăнти влаç та тахçанах алă сулнă. Ялсенче пурте пĕр-пĕрин çинчен пĕтĕмпех пĕлеççĕ, анчах хăрушсăрлăх йĕркине пăсакансем çинчен патшалăх инстанцийĕсене хыпарлама васкамаççĕ. Милицин участокри уполномоченнăйĕсен, патшалăх пушар асăрхавĕн-тĕрĕслевĕн сотрудникĕсен кашни çуртра, хваттерте тĕрĕслевсем ирттерме май çук. Ку ĕçе халăх та хутшăнсан, йĕркене пăсакансем тĕлĕшпе çирĕп мерăсем йышăнма, чылай пушара асăрхаттарма май пулĕ.
Ачасем пирки уйрăммăнах каласа хăварас килет. Вĕсем шăрпăк алла тытнăран пушар тухни – паянхи куна чи çивĕч ыйту. Çуллахи каникулсен вăхăчĕ пуçланнă, ача сачĕсем юсава хупăннă май лару-тăру татах та кăткăсланас хăрушлăх пур. Хăшĕ-пĕрисене аслашшĕ-асламăшĕсем пăхаççĕ, теприсем вара кунĕпех хăйсем тĕллĕн ирĕкре, асăрхавсăр юлаççĕ. Çавăнпа та килте – ашшĕ-амăшĕсен, ача сачĕсенче – воспитательсен, шкулсенче вĕрентекенсен ăнлантару ĕçне ирттермелле, ачасем пушар хăрушсăрлăх правилисене пăхăнассине тивĕçтермелле, инкек кăларма пултаракан сăлтавсене вăхăтра пĕтермелле. Çулăмран тухакан хăрушлăха ача мĕн пĕчĕкрен ăнланма хăнăхтăр.