04 июня 2008 г.
2008 çулхи I кварталта номиналлă шутласа панă уйăхри вăтам ĕç укçи 10105,2 тенкĕ пулнă, 2007 çулхи çав вăхăтрипе танлаштарсан 34,1 процент ÿснĕ. Кăçалхи пуш уйăхĕнче пĕлтĕрхи çав тапхăртинчен вăл 34,4 процент хăпарнă, 10588,6 тенке çитнĕ.
Потребитель хакĕсен индексне тĕпе хурса шутланă чăн ĕç укçи 2008 çулхи I кварталта тата кăçалхи пуш уйăхĕнче пĕлтĕрхи çав вăхăтринчен 17,6 тата 17,2 процент хăпарнă.
2008 çулхи I кварталта республикăри вăтам шайпа танлаштарсан чи пысăк ĕç укçи финанс тытăмĕнче (2,1 хут ытларах) пулнă. Ял хуçалăхĕнче, сунарта, çак тытăмсенче пулăшу парас çĕрте республикăри вăтам шайринчен ĕç укçи 2,1 хут, канăва тата чун йăпатмăшне йĕркелес тытăмра, культурăра тата спортра, хăна çурчĕсенче, ресторансенче 39,5 – 36,7 процент пĕчĕкрех.
Пĕчĕк предпринимательлĕх субъекчĕ шутне кĕмен организацисенче вăй хуракансем кăçалхи виçĕ уйăхра Шупашкар хулинче (республикăри вăтам шайран 16,7 процент пысăкрах), Красноармейски районĕнче (7,9 процент нумайрах) – чи пысăк, Улатăр, Йĕпреç тата Хĕрлĕ Чутай районĕсенче чи пĕчĕк (42,2 – 37,9 процент сахалрах) ĕç укçи илнĕ.
Пĕчĕк предпринимательлĕх субъекчĕ шутне кĕмен организацисенче вăй хуракан кашни çын пуçне тивекен социаллă тÿлев кăçалхи I кварталта 75,1 тенкĕпе танлашнă тата иртнĕ çулхи çав тапхăртинчен 21,5 процент ÿснĕ.