04 июня 2008 г.
Славян çырулăхĕпе культурин, Пĕтĕм Раççейри библиотекăсен кунĕсене тата «Нарспи» поэма пичетленсе тухнăранпа 100 çул çитнине халалласа çу уйăхĕн 25-мĕшĕнче Маяковский ячĕллĕ вулавăш, Чуковский ячĕллĕ хулари ача-пăча тĕп библиотеки тата «Союз К-Чувашия» кĕнеке сутакан компани хулара Кĕнеке уявне ирттерчĕç.
Хулари тĕп библиотекăра чăваш писателĕсем йĕркеленĕ «Чĕлхе илемĕ – тĕнче уççи» литература тĕл пулăвĕ иртнĕ. Вăл «Нарспи» поэмăн пĕлтерĕшне хакланипе, паянхи чăваш литература аталанăвĕ çинчен хатĕрленĕ докладсемпе, çавра сĕтел тавра йĕркеленĕ тĕрлĕ калаçупа палăрчĕ.
Çĕрпÿ районĕнчи Сăнав поселокĕнче, Шупашкарти 56-мĕш вăтам шкулта тата Лебедев ячĕллĕ лицейра вĕренекен çамрăк çыравçăсем чăваш çыравçисемпе тĕл пулчĕç. Валентин Абрамов, Галина Белгалис, Иван Вутлан, Денис Гордеев, Сергей Павлов, Виталий Родионов, Лидия Сарине, Виталий Станьял вĕсемпе мастер-класс ирттерчĕç. Пухăннисем «Нарспи – вилĕмсĕр поэма» электрон презентацийĕпе тата «Чăваш Енĕн – литература тĕнчи», «Нарспи – халăх чĕринче» кĕнеке куравĕсемпе паллашрĕç.