04 июня 2008 г.
Федераллă налук службин Чăваш Республикинчи районсем хушшинчи 3-мĕш инспекци сотрудникĕсем Калининăри шкул-интерната час-часах килсе çÿрекен хăнасем. Пушă алăпа мар, ачасен кăмăлне çĕклес, савăнтарас тесе яланах парнесем хатĕрлеççĕ вĕсем. Ырă ĕçсен çулталăкĕнче ыркăмăллăх тĕллевĕпе пурнăçлакан ĕçсене татах та вăйлатрĕç налук органĕнче тимлекенсем.
Чи çепĕç те хумхануллă уяв – Ачасене хÿтĕлемелли кун – умĕн те налукçăсем шкул-интерната савăнăçлă миссипе килсе çитнĕ: инспекци пуçлăхĕн заместителĕ Ю.Данилова, профсоюз председателĕ Т.Никифорова ачасене тĕслĕ телевизор тата ăна лартмалли кронштейн парнеленĕ.
«Чуна хумхантаракан çак уява ахаль ирттерсе яма нимле те пултараймарăмăр. Ачасем – пирĕн пуласлăх. Эпир вĕсен телейĕшĕн яваплă. Кăшт та пулин вĕсен пурнăçне савăнăç кĕртме, çăмăллатма пултаратпăр пулсан çак майпа усă курмаллах», – пĕлтернĕ хăнасем шкул-интернат воспитанникĕсене саламланă май. Кунсăр пуçне çуллахи каникул вăхăтне хаваслă, çав вăхăтрах усăллă ирттерме суннă.
Калининăри шкул-интернат директорĕ А.Шоколева хăйсен воспитанникĕсене пысăк тимлĕх уйăрнăшăн, яланах пулăшма хатĕрришĕн тата уяв ячĕпе пысăк парне тунăшăн Федераллă налук службин Чăваш Республикинчи районсем хушшинчи 3-мĕш инспекци ĕçченĕсене пĕтĕм чун-чĕререн тав тунă. Ачасене ырă сунакан, пулăшу аллине тăсакан çынсене кунта яланах хапăл туса кĕтсе илнине çирĕплетнĕ.