04 июня 2008 г.

Ĕçпе юрă тата спорт уявĕ ял хуçалăхĕнче, производствăра, вĕрентÿре, суту-илÿре тата ытти сферăра тимлекен вун-вун çыншăн савăнăçлă самантпа асра юлчĕ. Вĕсем, ырми-канми ĕçĕпе районăн экономикипе социаллă пурнăç аталанăвне палăрмалла тÿпе хывакансем, Акатуй сцени çинче сумлă вырăна йышăнни ахальтен мар. Малта пыракансене шăпах чăвашсен аслă уявĕнче тĕрлĕ шайри наградăсемпе чаплăн чысларĕç.
Пирĕн район ака-суха ĕçĕсем тăвассипе кăçал республикăра чăннипех те палăрчĕ. Пĕрлешÿллĕ хуçалăхсенче тĕш тырăсемпе пăрçа йышши культурăсене планпа палăртнинчен чылай ытларах хывса хăварнă. Урпа 5974 гектар, çурхи тулă 1435 гектар, пăрçа йышши культурăсем 120 гектар, «иккĕмĕш çăкăр» 1175 гектар йышăнаççĕ. Çурхи ĕçсенче уйрăмах «Победа», «Мураты», К.Маркс ячĕллĕ, аш-какай комбиначĕн хушма тата ытти хăш-пĕр хуçалăхсем палăрчĕç.
«АПК аталанăвĕ» малашлăхлă наци проектне пурнăçласа хуçалăхсенче тимлекенсем выльăх-чĕрлĕх отрасльне хăвăртлăхпа аталантарассине те тĕпе хураççĕ. Ĕç кăтартăвĕсем алă тупанĕ çинчи пек – аш-пăш, сĕт туса илесси ÿссе пырать.
Район социаллă пĕлтерĕшлĕ ыйтусене татса парассипе те малтисен йышĕнче. Иртнĕ çул акă вăл пурăнмалли çурт-йĕр çĕклессипе республикăра чи лайăх ĕçлекенсенчен пĕри пулса тăчĕ. Аякри ялсене асфальтлă çулпа çыхăнтарассипе те ыррисен шутĕнче. «Çак масштаблă проекта кăçал вĕçлемелле, – палăртрĕ хăйĕн сăмахĕнче район пуçлăхĕ Анатолий Кузьмин. – Курăмлă ĕçсем пĕтĕмпех пирĕн районта тăван çĕре юратакан, ĕçлекен çынсем пурăннипе пулса пыраççĕ».
Анатолий Иванович уява пухăннă мĕнпур халăха ырă, ырми-канми ĕçсемшĕн, тăван ял, хуçалăх, район аталанăвне тÿпе хывнăшăн тав турĕ.
Чăваш Патшалăх Канашĕн депутачĕ – «Август» фирма филиалĕн «Вăрнарти хутăш препаратсен завочĕн» директорĕ В.Свешников, сумлă хăнасем те – вăл йышра ЧР экономика аталанăвĕн тата суту-илÿ министрĕ И.Моторин, «Россельхозбанк» АУО-н Чăваш регионти уйрăмĕн ертÿçи И.Письменская, патшалăх техника асăрхавĕн Чăваш енри комитечĕн ертÿçи В.Дмитриев, Украинăри Золотоноша район пуçлăхĕн пĕрремĕш заместителĕ П.Мельничук ертсе пыракан делегацийĕ (ертÿçи Г.Бурмистров), Раççей Перекет банкĕн Чăваш енри уйрăмĕн пай начальникĕ В.Соловьев, Вăрнарсен «Туслăх» ентешлĕхĕн делегацийĕ т. ыт. те – вăрнарсен ĕçри хастарлăхне, хавхаланăвне ырласа палăртрĕç, чи маттуррисене – хăйсемпе тачă çыхăнса ĕçлекенсене – грамотăсемпе, парнесемпе чысларĕç.
– Акатуй – ĕçсене пĕтĕмлетме май паракан кăна мар, татса паман ыйтусене хускатакан, малашнехи аталану çулне палăртакан уяв та, – тенĕ хăйĕн сăмахĕнче Чăваш ен Президенчĕ Николай Федоров. Республика пуçлăхĕн саламлă телеграммине вуласа панă май, экономика министрĕ пирĕн район пуçлăхне А.Кузьмина района аталану çулĕпе тĕрĕс илсе пынăшăн тав турĕ.
Кăçал районта усăсăр выртакан çĕрсене çаврăнăша кĕртессипе пысăк ĕç пурнăçланă, ку енĕпе уйрăмах «Вурнарская» агрофирма (ертÿçи – Валерий Михайлов), К.Маркс ячĕллĕ хуçалăх (Валерий Шумилов), аш-какай комбиначĕн хушма хуçалăхĕ (Николай Аливанов) хастар тимленĕ. Уявра вĕсем район администрацийĕн грамотисене тата хаклă парнесене тивĕçрĕç.
Çавăн пекех «Санары» агрофирма директорне Роберт Петрова «иккĕмĕш çăкăр» лаптăкне ÿстернĕшĕн, «Мураты» хуçалăх ертÿçине Геннадий Спиридонова çурхи ака-суха ĕçĕсенче малта пулнăшăн, «Луч» хуçалăх ертÿçине Вячеслав Ижелеева ял хуçалăх производствине ÿстерессипе çине тăрса ĕçленĕшĕн тата ыттисене те грамотăсемпе парнесем пачĕç.
Йăлана кĕнĕ тăрăх Акатуйра Вăрнар çĕрĕ çулсеренех Украинăри ĕçтешĕсене йышăнать. Делегаци ертÿçи Золотоноша районĕн пуçлăхĕн заместителĕ П.Мельничук 40 çул каялла хывăннă туслăхăн историне аса илчĕ. Икĕ çĕршыв, икĕ район хушшинче опытпа улшăнни, сĕнÿсемпе ылмашăнни ĕçре чылай çитĕнÿсем тума май панине палăртрĕ.
Пирĕн район килти хушма хуçалăха аталантарма çăмăллатнă кредитпа усă курас енĕпе ытти районсене ырă тĕслĕх кăтартать. Астăвасса, «Россельхозбанкăн» республикăри уйрăмĕн ертÿçи И.Письменская маларахри çулсенчи Акатуйсенче 100-мĕш тата 500-мĕш клиентсене чысланăччĕ. Кăçал вара пиннĕмĕш те пур. Вăл – Кĕçĕн Кипек ял поселенийĕнчи Олег Илларионов. Ял хуçалăх банкĕн ертÿçи ăна вăкăр парнеленине ĕнентерекен свидетельствăпа чысларĕ.
Чăваш Республикин Ял хуçалăх министерствин грамотисене «Победа» хуçалăхăн механизаторĕ Анатолий Александров, «Знамя» хуçалăх ертÿçи Вячеслав Васильев, «Санары» агрофирма механизаторĕ Николай Иванов, К.Маркс ячĕллĕ хуçалăхăн тĕп инженерĕ Рафик Юсупов, район администрацийĕн водителĕ Михаил Ильин илме тивĕç пулчĕç. Раççей ял хуçалăх центрĕн Чăваш енри филиалĕн Вăрнар районĕнчи пайĕн специалистне Елизавета Алексеевана вара Раççей Ял хуçалăх министерствин Хисеп грамотипе наградăларĕç.
Уйкас Кипек ял тăрăхĕ юлашки çулсенче ял инфраструктурине аталантарассипе, социаллă ыйтусене татса парассипе кăтартуллă ĕçлеме тытăнчĕ. Уявра унăн пуçлăхне Людмила Илларионована 2007 çулхи кăтартусемпе «Чи лайăх ĕçлекен муниципаллă пĕрлĕх» тата «Чи лайăх поселени пуçлăхĕ» ятсене илнĕ ятпа саламларĕç.
Вулакансене савăнтарма кăмăллă, ырă ĕçсемпе палăрнисем хушшинче пирĕн ĕçтешĕмĕр Ирина Данилова переплетчица та пур. Вăл район хаçачĕн типографийĕнче вунпилĕк çул ытла тÿрĕ кăмăлпа ĕçлесе пырать.
Ĕçре малта пыракансене чысланă хыççăн сценăна районти пултарулăх ушкăнĕсем йышăнчĕç. Вĕсем пухăннисене чăваш, вырăс халăх, эстрада юррисемпе, тĕрлĕ халăх ташшисемпе тыткăнларĕç.
Площадкăсенче пĕр вăхăтрах спорт ăмăртăвĕсем пычĕç. «Химик» стадион Акатуй кубокĕшĕн пыракан финал вăййисене йыхравларĕ. Тĕп парнене кăçал Вăрнарти «Химик», «Гвардеец» (Ярмушка ял поселенийĕ) командăран 3:2 шутпа çĕнсе илчĕ. Волейболпа «Вурнарыгаз» çамрăксем малта пулчĕç. Çак кун çавăн пекех шашка, шахмат, кире спорчĕпе тата ытти вăйăсем пычĕç. Суту-илÿ точкисем уява пухăннисене шÿрпепе, шашлăкпа сăйларĕç.