02 июня 2008 г.

Республикăри чи аслă вĕренÿ заведенийĕсенчен пĕри – Вăрнарти ял хуçалăх техникумĕ – хăнасене яланах хапăл туса йышăнма хатĕр. Акă кунти хушма хуçалăхра ĕнесене машинăпа сăвакан операторсемпе техник-осеменаторсен районти смотр-конкурсне ирттерме лайăх условисем туса панă. Çакна конкурсантсем те, судьясен коллегийĕ те кăмăллăн палăртрĕç.
Ăмăртăва савăнăçлă лару-тăрура район администрацийĕн ял хуçалăхĕпе экологи пайĕн тĕп зоотехникĕ Г.Романов уçрĕ. Вăл выльăх-чĕрлĕх отрасльне аталантарассипе районта мĕнле тимлени пирки каласа кăтартрĕ, смотр-конкурса хутшăнакансене пурне те ăнăçу, иксĕлми вăй-хăват сунчĕ. Ял хуçалăх техникумĕн директорĕн производство вĕрентĕвĕ енĕпе ĕçлекен заместителĕ Н.Михайлова сăмах илнĕ май, фермăра тăрăшакансене пĕлĕве тарăнлатса пымалли çинчен асилтерчĕ. «Техникумра куçăмсăр майпа вĕренсе тĕрлĕ профессие алла илме пулать. Пирĕн вĕренÿ заведенийĕн алăкĕсем сирĕншĕн яланах уçă», – терĕ вăл.
Кăçал ăмăрту ялавне çĕклеме пĕлтĕрхи тупăшура малти вырăнсене йышăннă З.Углов техник-осеменаторпа О.Козлова доярка тивĕç пулчĕç.
Ĕне сăвакан операторсем пĕр-пĕринпе, ĕне сумалли аппарата пуçтарассипе, сĕт суса илессипе, теорилле ыйтусене хуравлассипе ăмăртрĕç. Техник-осеменаторсен професси ăсталăхне 12 кăтарту тăрăх хакларĕç. Судьясен ушкăнĕ – Г.Романов, выльăх-чĕрлĕх чирĕсемпе кĕрешекен районти станци пуçлăхĕ Н.Тихонов, А.Гурьева ветеринари врачĕ, ветлаборатори заведующийĕ Е.Анисимова, ял хуçалăх техникумĕн преподавателĕсем М.Алексеев тата Н.Михайлова, «Чувашское» обществăн тĕп зоотехникĕ Н.Семенова – пĕтĕмлетÿсем тунă хыççăн ĕне сăвакансем хушшинче 97 балл пухса пĕрремĕш вырăна Ольга Козлова тухрĕ. Маттур доярка «Броневик» кооперативра вăй хурать. Иккĕмĕшпе виççĕмĕш вырăнсене Галина Николаевапа («Знамя») Елизавета Григорьева (Карл Маркс ячĕллĕ хуçалăх) йышăнчĕç. Техник-осеменаторсенчен чи малта «Кольцовка» агрофирмăри Галина Росадина пулчĕ. Вăл 99,5 балл пухма пултарчĕ. Пьедесталăн сумлă картлашкисем çине тăма çавăн пекех Валентина Васильева (техникум), Нина Лукина («Родник») тивĕçрĕç.
Ăмăртăва ял хуçалăх техникумĕнче пĕлÿ пухакансем те хастар хутшăнчĕç. Иван Карповпа Татьяна Николаева ыттисенчен нумайрах балл пухма пултарчĕç. Çак конкурса тĕплĕн хатĕрленĕшĕн çамрăксем Н.Михайловапа М.Алексеев вĕрентекенсене тав турĕç. Техникум администрацийĕ тăрăшнипе студентсем конкурсантсене концерт кăтартса савăнтарчĕç.
Ăмăртура чи савăнăçлă самант – мала тухнисене чыслани. Чи маттуррисем, призлă вырăнсене йышăннисем, район администрацийĕн Хисеп грамотине тата хаклă парнене тивĕçрĕç. Паллах, пурте пьедесталăн картлашки çине хăпараймаççĕ. Хастар пулнăшăн пур оператора, техник-осеменатора, техникумра вĕренекенсене парнесем пачĕç.
Юлашкинчен ăмăрту ялавне Ольга Козловăпа Галина Росадина антарчĕç. Вĕсен çĕртме уйăхĕнче республикăри конкурса хутшăнмалла.