02 июня 2008 г.
Нумай хваттерлĕ çуртсене тĕплĕн юсасси çăмăл мар, укçи-тенки те чылай кирлĕ. Унчченхи çулсенче ку ĕçе вырăнти бюджет вăйĕпе пурнăçланă, çак тĕллевпе 1 миллион та 700 пин тенкĕ енне укçа уйăрнă.
Пĕлтĕрхи июлĕн 21-мĕшĕнче, акă, «Пурăнмалли çурт-йĕрпе коммуналлă хуçалăха реформăлама пулăшмалли фонд çинчен» федераллă саккун йышăннă. Пирĕн район та ку тытăма реформăлассипе çыхăннă федераллă программăна хутшăнать.
Çапла майпа районти нумай хваттерлĕ çуртсене тĕпĕ-йĕрĕпе юсаса çĕнетме 53 миллион ытла тенкĕ килсе çитет: 41 миллион та 628 пин тенкине патшалăх корпорацийĕнчен – çурт-йĕрпе коммуналлă хуçалăха реформăлама пулăшмалли фондран, 10 миллион та 63 пин тенкине республика бюджетĕнчен, 1 миллион та 750 пин тенкине Вăрнар районĕн пĕрлештернĕ бюджетĕнчен уйăраççĕ.
Район администрацийĕн экономикăпа пурлăх хутшăнăвĕсен, строительство тата пурăнмалли çурт-йĕрпе коммуналлă хуçалăх пайĕсем çулталăк пуçламăшĕнче документсене хатĕрлессипе тăрăшса тимленĕ. Вĕсене района патшалăх корпорацийĕнчен пулăшма ыйтса çырнă заявкăпа пĕрле тăратнă.
Программăна кĕмелли условисенчен пĕри – çурт-йĕр харпăрлăхçисен пĕрлешĕвĕсене туса хурасси. Вĕсем нумай хваттерлĕ çуртсен пĕтĕм йышĕн 5 процентĕнчен кая мар пулмалла. Районта çакнашкал пĕрлешÿсем, сăмахран, 15 çуртра пур.
Района тивĕçекен укçа поселокри 19 тата Калининăри 2 çуртра тĕплĕ юсав ĕçĕсем ирттерме кайĕ.