02 июня 2008 г.
Пограничниксем Тăван çĕршыв чиккине сыхласа çар тивĕçне чыслăн пурнăçлаççĕ. Вĕсем шанчăклă, тÿрĕ чунлă, хăюллă пулнипе эпир лăпкă, пĕр шикленмесĕр çывăратпăр. Симĕс карттуслисене пысăк чыс та хисеп. Раççейре пурăнакансем Пограничник кунне уявлама тытăннăранпа кăçал 90 çул çитрĕ. Чикĕ хуралĕнче службăра тăнисем юнкун Вăрнар поселокĕнчи Асăну скверне пухăнчĕç.
Митинга запасри пограничниксен «Щит Родины» обществăлла пĕрлешĕвĕн председателĕ В.Михайлов савăнăçлă лару-тăрура уçрĕ, уяв ячĕпе пурне те ăшшăн саламларĕ. Праçнике космонавтикăна пулăшакан «Байконур – Шупашкар» ассоциацин президенчĕ В.П.Тихонов та килнĕ. «Тăван çĕршыва хÿтĕлесси – чи пысăк та таса тивĕç. Хаклă пограничниксем, сирĕн ырă тĕслĕх çамрăк ăрăва пурнăçра тĕрĕс çулпа пыма вĕрентет... Хурçă пек çирĕп сывлăх, вăрăм ĕмĕр, сÿнми телей, çутă ăраскал, иксĕлми вăй-хăват сунатăп...» – ырă сăмахсем каларĕ вăл митинга пухăннисем умĕнче.
Райадминистрацин социаллă аталану пайĕн пуçлăхĕ И.Павлов, тĕп специалисчĕ А.Ильин та сăмах илчĕç, «Щит Родины» пĕрлешÿре тăракансене яш-кĕрĕме çарпа патриотизмла воспитани парассипе тухăçлă ĕçленĕшĕн тав турĕç.
Паттăрлăх манăçмасть. Чикĕ хуралланă чух пирĕн ентешсем – А.Г.Евграфов, Н.И.Алексеев, В.Г.Михайлов – çамрăклах пуçĕсене хунă.
«Тăван çĕршыв чысĕшĕн хăйсен пурнăçне шеллемен паттăр салтаксен ятне кашни асра тыттăр», – терĕ В.Михайлов.
Вилнĕ пограничниксене асăнса лартнă обелиск умне 1987 – 1989 çулсенче Камчаткăра чикĕ хуралланă С.Никандровăн ывăлĕ Никита чи малтан чечексем пырса хучĕ. Салтак тумне тăхăннă пĕчĕк арçын ача хыççăн митинга хутшăннисем те паттăррăн пуçĕсене хунă юлташĕсене чыс тума палăк патне васкарĕç. А.Евграфовăн ашшĕ – Геннадий Иванович – вилнисене манăçа кăларманшăн пурне те чун-чĕререн тав турĕ.