28 мая 2008 г.
Çумăрлă çанталăк пулнине пăхмасăрах канмалли кунсенче Шупашкарти «Олимпийский» стадионта çăмăл атлетика енĕпе иртнĕ Чăваш ен первенствипе чемпионатĕнче район спортсменĕсем питĕ ăнăçлă ăмăртнă. Пĕтĕмĕшле кăтартупа команда – иккĕмĕш!
Уйрăмшар зачетри результатсем лайăхрах. Пĕрремĕш кунне акă йĕтре тĕксе Галя Павлова виççĕмĕш вырăн йышăннă. Сăнă ывăтассипе вăлах бронза призер пулса тăнă.
Çамрăксем хушшинче 400 метрă дистанцире Мальвина Михайлова (Шĕнер Ишек) виççĕмĕш пулнă. Катя Горбунова (Хурăнсур Çармăс) вара 1500 метра пуринчен малтан чупса тухнă. Ку дистанцирех Таня Макарова (Кăмпал) иккĕмĕш, Сергей Политов (Вăрнар) виççĕмĕш вырăнсене йышăннă. 2000 метра чăрмавсемпе чупса Аçăмçырминчи Таня Ефимова чи лайăх результат кăтартнă.
4х100 метрлă эстафетăра та вăрнарсем призерсен йышĕнче. Галя Павловаран, Таня Ефимоваран, Мальвина Михайловаран, Катя Горбуноваран тăракан команда вăхăт кăтартăвĕпе – иккĕмĕш.
Иккĕмĕш кунне 800 метрта Таня Макаровапа Таня Ефимова чи хăвăрттисем пулнă, Андрей Николаев – иккĕмĕш, 3000 метрта çамрăксем хушшинче Сергей Политов – виççĕмĕш.
4х400 метрлă эстафетăра вăрнарсен результачĕ – чи лайăххи. Таня Ефимова, Мальвина Михайлова, Марина Гордеева, Катя Горбунова дистанцие ыттисене 100 метр ытла кая хăварса вĕçленĕ, ылтăн медале тивĕçнĕ.