28 мая 2008 г.
Пурăннă пулсан май уйăхĕн 23-мĕшĕнче, Çăкаллă Явăшра çуралса ÿснĕ, унтах ĕмĕрне ирттернĕ пирĕншĕн чи хаклă та юратнă çын – атте Исаак Афанасьевич Афанасьев 80 çулхи юбилейне паллă тăватчĕ. Питех те кĕтетчĕ вăл çак куна, пур тăванне, тус-юлташне, кÿршĕсене лартасшăнччĕ кĕреке хушшине. Шел, уявччен 4 уйăх та 10 кун пурăнса çитеймерĕ, ун ĕмĕчĕ чире пула татăлчĕ, аттемĕр пирĕнтен яланлăхах уйрăлса кайрĕ.
Явăш тăрăхĕнчи чи хисеплĕ, чи сумлă çынсенчен пĕриччĕ атте. Вăл хăй ĕмĕрне Ульянов ячĕллĕ хуçалăхра уй-хир бригадирĕнче, ферма заведующийĕнче ĕçлесе ирттерчĕ.
Ĕçре пысăк çитĕнÿсем тунăшăн, чунтан парăнса ĕçленĕшĕн, тăрăшулăхпа хастарлăх кăтартнăшăн ăна медальсемпе, тĕрлĕ паллăсемпе дипломсем парса чыс тунă. Халăхсен туслăхĕн орденне тивĕçнĕ, вăл – Чăваш Республикин ял хуçалăхăн тава тивĕçлĕ ĕçченĕ.
Аттен çуралнă кунĕ умĕн хăй пуçтарса пынă çемье архивне тепĕр хут пăхса тухрăм – «Коммунизм ялавĕ», «Советская Чувашия», «Çĕнтерÿ çулĕ» хаçатсенче çырнă статьясенче ун çинчен темĕн чухлĕ ыррине çырнă. Ăçта йывăр, ăçта ĕç-пуç япăхланнă – йĕркелесе яма ăна суйласа лартнă.
Чунра темле лăпкăлăх, канлĕх çуралчĕ çак статьясене вуласан: атте ĕмĕрне ахаль ирттермен, хăйĕн хыççăн ырă ят хăварнă çĕр çинче. Çавăнпа эпир унпа тивĕçлипех мухтанатпăр.
Тем пек йывăр пулсан та вăхăт малаллах шăвать. Нихăçан та тÿрленмĕ чĕрери суран, нихăçан та асран тухмĕ атте сăнарĕ, атте сасси. Куç умĕнчех-çке эсĕ, атте! Хушăран тĕлĕкри пек те туйăнать, пĕрре те ĕненес килмест эсĕ текех пирĕнпе пĕрле çуккине. Питĕ тунсăх, кичем сансăр. Эпир анчах мар, хăв çитĕнтернĕ пысăк сад та, пахчари чечексем те, мăлатукки-пуртти те, сенкĕ-кĕреçи те, хăв лартнă кил-çурт та – пурте тунсăхлаççĕ. Мĕн тăвăн, шăпа пире унпа тата та ытларах савăнса пурăнма пÿрмерĕ.
Хаçат вулакансенчен аттене нумайăшĕ палласа илчĕ пулĕ, вĕсем пирĕн хуйха пĕрле пайлаççех ĕнтĕ. Тавтапуç пурне те!