28 мая 2008 г.
Пĕлтернĕччĕ ĕнтĕ, «Çĕнтерÿ çулĕ» хаçат тусĕсем хушшинче ирттернĕ вылявра хальхинче чи хаклă парне – тĕрлĕ тĕслĕ кăтартакан телевизор – Кивьял Нурăсри Георгий Владимирович Улаева тухрĕ.
Телевизор хуçи тунтикун ир-ирех юлташĕсемпе пĕрле редакцие персе çитрĕ. Хăйĕн савăнăçне пытараймасть, пичĕ-куçĕ йăл кулăпа çиçет.
– Шăматкунхи хаçатра телевизор мана тухни çинчен пĕлтернине темиçе хутчен те вуларăм, тÿрех ниепле те ĕненмерĕм, – тет хайхискер. – Çав кун кÿршĕсем те, ял çыннисем те саламларĕç, телейлĕ-çке эс, теççĕ. Чăнах та ĕмĕр асра юлмалли парне пулчĕ маншăн сирĕн телевизор! Пĕлетĕр-и, май уйăхĕн 20-мĕшĕнче эпĕ утмăл пиллĕк тултартăм, тепĕр кунне ирттернĕ вылявра вара мана çавнашкал парне лекрĕ. Юмахри пек мар-и; Тĕрĕссипе, «Çĕнтерÿ çулне» парнешĕн çырăнмастăп, ăна эпĕ тахçантанпах илсе тăратăп.
Георгий Владимирович ĕмĕрĕпе «Броневик» колхозра ĕçленĕ. Маттур колхозник ялта ят-сум çĕнсе илнĕ. Ĕç ветеранĕ. Халĕ вăл пĕчченех пурăнать – шел, çĕнĕ çул умĕн мăшăрĕ вăхăтсăр çĕре кĕнĕ, хĕрĕ Киров облаçĕнче вăй хурать. «Хамăн савăнăçа Светланăна çав кунах шăнкăравласа пĕлтертĕм», – тет Г.Улаев.
– Пурне те «Çĕнтерÿ çулне» çырăнса илме сĕнетĕп. Вăл районти кашни килте кĕтнĕ хăна пултăр, – терĕ юлашкинчен Георгий Владимирович.