24 мая 2008 г.
Иртнĕ юнкун Вăрнарти ял хуçалăх техникумĕн стадионĕнче техникумра 20 çул ытла преподаватель, физвоспитани ертÿçи пулса ĕçленĕ, СССР спорт мастерĕ Валерьян Миронович Миронов çуралнăранпа 70 çул çитнине асăнса çăмăл атлетика енĕпе студентсем хушшинче эстафета иртрĕ. Ăмăртăва çичĕ ушкăн хутшăнчĕ. Çивĕч ăмăртура 313-мĕш (пулас технологсем) ушкăн команди дистанцие 5 минут та 37 çеккунтра чупса тухса пĕрремĕш вырăн йышăнчĕ. Е.Дубровина, С.Афанасьева, В.Ложкин, А.Кузьмин, С.Матвеев хăйсен ăсталăхне кăтартрĕç. Çĕнтерÿçĕсене куçса çÿрекен кубок, Хисеп грамоти тата хаклă парнесем парса чысларĕç. Иккĕмĕшпе виççĕмĕш вырăнсене 113-мĕшпе (технологсем) 321-мĕш (экономистсем) ушкăнсенче вĕренекенсем йышăнчĕç. Вĕсене те Хисеп грамотисемпе хаклă парнесем пачĕç.
Техникум директорĕн воспитани енĕпе ĕçлекен çумĕ Н.Старостин, В.Миронов юлташĕсем – СССР спорт мастерĕсем В.Наумовпа В.Прахеев, В.Мироновăн йăмăкĕ Ф.Николаева техникума ертсе пыракансене ырă пуçару тунăшăн тав сăмахĕсем каларĕç, ăмăртăва хутшăнакансене спортра, вĕренÿре, пурнăçра ăнăçу сунчĕç. Пухăннисем библиотекăра сăн ÿкерчĕксенчен йĕркеленĕ стендпа паллашрĕç.
Çак ăмăртăва техникум директорĕ И.А.Арбузов, физвоспитани ертÿçи СССР спорт мастерĕ А.Созонов пуçарăвĕпе ирттерчĕç.
Техникум дирекцийĕ В.Мироновăн ырă ятне асăнса çирĕплетнĕ кубокшăн ăмăртусене ырă йăлана кĕртсе малашне те кашни çулах анлăрах ирттерме йышăнчĕ.
Ăмăрту вĕçĕнче делегаци членĕсем В.Миронов вил тăприйĕ çине чĕрĕ чечек çыххисем хучĕç.