24 мая 2008 г.
Çак ыйту Андрей Николаевич Щукина Хусанти авиаци институтĕнче вĕреннĕ чухнех пăшăрхантарнă: чăваш ачисене мĕншĕн чăваш ячĕсене паман; Пирĕн те нумай-çке вĕсем: Салампи, Элпи, Илемпи... Чăваш халăх писателĕ Юхма Мишши те çак ыйтупах канăçсăрланнă – вăл чăн чăваш сăмахĕсен пуххине пичетлесе кăларма ĕмĕтленнĕ. Ик хастарăн пĕрреллĕ шухăшĕ çулсем иртсен пурнăçланнă. Кун çути курнă «Ятсем. Имена» кĕнеки халĕ вулакансем хушшинче ырă ятра.
Ытларикун ĕçлĕ çулçÿревпе Вăрманкасри шкулта пулнă май Юхма Мишши çак кĕнекери чылай сăмахпа чăвашсем усă курманнине кулянарах палăртрĕ. «Ачасем, эсир учитель сăмах чăн чăвашла мĕнле янăранине пĕлетĕр-и;»– ыйтрĕ вăл. Алă çĕклекенсем тупăнмарĕç, анчах та «шаврал» сăмаха вĕсем яланлăх ас туса юлĕç.
Михаил Николаевич пушă алăпа килмен, шкул библиотекине вăл 303 экземпляр кĕнеке парнелерĕ. Паллах, ытларахăшĕ хăй çырнисем. Вĕсем, чăваш халăх историйĕпе культурине, пурнăçне туллин çутатаканскерсем, ачасен вулас туртăмне, пĕлĕвне ÿстерес ĕçре сумлă вырăн йышăнĕç. Парне шутĕнче паха произведенисем те пур. Акă «Древние чуваши» кĕнекене чылай чĕлхене куçарнă. Писатель çывăх вăхăтра унăн тата тепĕр кĕнеки пичетленсе тухассине пĕлтерчĕ.
Вĕренекенсем те парăмра юлмарĕç – Юхма Мишшин тарăн шухăшлă сăввисене çĕкленÿллĕ вуларĕç.
Çак тĕл пулу тепĕр самантпа та асра юлчĕ. Халăх писателĕ ун йĕркелÿçине, спонсора – Вăрманкасра çуралса ÿснĕ, кунти шкултан вĕренсе тухнă Андрей Щукина – чăваш наци культурине аталантарас, культурăпа çутĕç тата историпе вĕрентÿллĕ кĕнекесем кăларма пулăшас ĕçе пысăк тÿпе хывнăшăн И.Я.Яковлев ячĕллĕ премие тата диплом парса чысларĕ. Лауреатсен йышĕнче Андрей Николаевич – вунвиççĕмĕш. Кĕтмен парне предпринимателе те хавхалантарчĕ, вăл юлташ-ĕçтешне чĕререн тав турĕ.
Тав сăмахĕсемпе çавăн пекех шкул директорĕ И.Лукина, Вăрманкас ял поселенийĕн пуçлăхĕ М.Кошкина, вĕрентÿ ветеранĕ П.Оськин тухса каларĕç.
Хăнасем ял библиотекинче пулчĕç, унăн ĕçĕ-хĕлĕпе паллашрĕç, вулакансемпе калаçрĕç.