24 мая 2008 г.
Шкултан вĕренсе тухакансен хумхануллă самант çитрĕ. Ĕнер вĕсем вĕрентекенсенчен, ашшĕ-амăшĕнчен, юлташĕсенчен малашнехи пурнăçра телейпе ăнăçу сунакан салам сăмахĕсене йышăнчĕç. Умра – çĕнĕ те аслă тĕнчене илĕртекен анлă çул. Ун тăрăх харпăр-хăйне çухатмасăр, тĕрĕслĕхпе сăпайлăха чунра тытса тĕллевлĕн утасчĕ.
Районта кăçал тăван шкулпа 388 вĕренекен сыв пуллашать. Юлашки шăнкăрав уявĕпе вĕсене яланхиллех район администрацийĕн ĕçченĕсем саламларĕç. Район пуçлăхĕ Анатолий Кузьмин Санарпуçĕнчи вăтам шкулта пулнă.
Вăрнарти 1-мĕш вăтам шкул кăçалхи вĕренÿ çулне пысăк кăтартупа вĕçлерĕ. Коллектив Раççей Президенчĕн пĕр миллион тенкĕлĕх патшалăх пулăшăвне çĕнсе илчĕ. Вырăс чĕлхипе литературине вĕрентекен Маргарита Викторовна Буславская 100 пин тенкĕлĕх гранта тивĕçрĕ. Уява хутшăннă май районти вĕрентÿ пайĕн пуçлăхĕ Николай Иванов пурне те çак çитĕнÿсемпе саламларĕ, асăннă шкул кăтартуллисен йышĕнче пулнине палăртрĕ, вунпĕрмĕшсене пурнăçра тĕрĕс çул суйласа илме ăнăçу сунчĕ. Чи пултаруллисене – районти конкурс-олимпиада çĕнтерÿçисене – Хисеп грамотисемпе чысларĕ.