22 мая 2008 г.
Кивĕ Мĕлĕшпе Çĕнĕ Хирпуç ялĕсем хушшипе юхакан Çавал урлă каçма кĕпер пурччĕ. Анчах та çуркунне шыв çырансене ишĕлтерсе ăна юхтарса кайрĕ. Иртсе çÿрекенсем Çавал урлă хăмасем хурса аран каçкалатчĕç. Çулĕ те пылчăклăччĕ, утма май çукчĕ. Юрать, икĕ яла çыхăнтарма пысăк ĕç пуçларĕç, çĕнĕ кĕпер тума тата асфальт çул сарма тытăнчĕç. Рабочисем Шупашкартан килчĕç. Вĕсем хĕлĕпех кунта пурăнчĕç, кунĕн-çĕрĕн ĕçлерĕç. Халĕ кĕпере туса пĕтернĕпе пĕрех.
Эпир хамăр Лариса Владимировна тата Надежда Анатольевна вĕрентекенсемпе унта экскурсире пултăмăр. Çĕнĕ кĕпер Кивĕ Мĕлĕшрен тухсанах курăнать. Авă мĕнле вăл чаплă, пысăк! Кĕпер çине хăпарса тăтăмăр, таврана сăнатпăр. Аякрах мар Хирпуç вăрманĕ кашлать. Унта темĕн тĕрлĕ кайăк сасси илтĕнет. Кунтан ял кĕтĕвĕ çÿрет. Илемлĕ-çке пирĕн тавралăх!
Мана çĕнĕ кĕпер питĕ килĕшрĕ. Ял пурнăçĕ лайăхланать. Икĕ ял туслашса, çĕнелсе пыраççĕ. Çĕнĕ çулпа çĕнĕ кĕпер вĕсене илемлетеççĕ.