22 мая 2008 г.
Çак ятпа Хирпуç ял поселенийĕнче ырă ĕçсен марафонĕ малалла пырать. Вăл çулталăк пуçламăшĕнчех старт илнĕ.
Уравăшри вăтам шкулта хăй ирĕклĕх отрячĕсене йĕркеленĕ. Вĕсем ватă çынсемпе вăрçă ветеранĕсене пулăшаççĕ, ял урамĕсене тасатас ĕçре хастар.
Уравăшри культура çурчĕпе тĕслĕх библиотекăсен ĕçченĕсем тĕрлĕ акцисем, ырăлăх калаçăвĕсем йĕркелерĕç.
Утарсем çуркуннепе ĕç уявĕнче акă массăллă мероприяти ирттерчĕç. «Хаваслă стартсенче» аслисем те, кĕçĕннисем те тупăшрĕç. Культура çурчĕ çумĕнчи пултарулăх ушкăнĕ концертпа савăнтарчĕ.
Уйрăмах «Ăçта эсир, талантсем;» конкурс кăсăклă иртрĕ. Инна Прокопьевапа Настя Ермошкина юрланине хытă килĕштерчĕç. Ташăçсем тĕрлĕ ташăсем лартрĕç, пултаруллисем парнесене тивĕçрĕç. А.Б.Васильевпа Н.М.Сидюхин купăсçăсем уява тĕрлĕ кĕвĕпе илемлетрĕç. Хĕрарăмсемпе арçынсем волейболла выляса тупăшрĕç.
Çак мероприятие ирттерме Иринăпа Александр Федотовсем, предпринимательсем, пулăшрĕç.
Марафон йĕркипех Уравăш ялĕнче субботник иртрĕ. Район администрацийĕн тата культура ĕçченĕсемпе пĕрле ял çыннисем сăваплă вырăна – масара – тирпей-илем кĕртрĕç.
Çак кунсем пирĕншĕн тепĕр паллă пулăмпа та асра юлчĕç. «Единая Россия» партин вырăнти уйрăмĕн политканашĕн секретарĕ, Чăваш Патшалăх Канашĕн депутачĕ Владимир Свешников Уравăшри культура çуртне тĕрлĕ тĕслĕ кăтартакан телевизор парнелерĕ. Парнене тыттарнă май партин Вăрнарти уйрăмĕн представителĕ Леонид Захаров культура ĕçченĕсене малашне те тăрăшуллă пулма ăнăçу сунчĕ.