22 мая 2008 г.

Хурăнсур-çармăссем сывă пурнăç йĕркине пăхăннине ял аталанăвĕн тĕп çул-йĕрĕпе танлаштараççĕ. Çакна вĕсем вăй-хал тупăшăвĕн тĕрлĕ мероприятийĕсене пĕтĕм ял-йышпа хутшăнни те çирĕплетет.
Черетлĕ спорт уявне акă вĕсем хăвăрт утассипе Шупашкарта иртнĕ 23-мĕш Тĕнче кубокне халалланă. Спортăн çичĕ тĕсĕпе вăл виçĕ куна тăсăлнă. Кăçалхи ăмăртусен пуçаруçипе тĕп спонсорĕ – ялти клуб директорĕ Михаил Кузьмин.
Спорт уявне уçнă май «Хорнзор» ял хуçалăх кооперативĕн пуçлăхĕ Федор Кузьмин тăван ялта массăллă спорт вăй илсе пынине, культурăпа спорт центрĕ уçăлсан ăсталăха ÿстерме майсем тата та пысăкрах пулассине палăртнă. Сăмах май, Федор Григорьевич спортра хăй те пысăк çитĕнÿсем тунă, вăл йывăр атлетикăпа спорт мастерĕн кандидачĕ, СССР тата Атăлçи тăрăхĕн чемпионĕ.
Николай Ванюшин ветеран çакнашкал мероприятисене поселенине кĕрекен виçĕ ялпа пĕрле ирттерме сĕннĕ.
Виçĕ кунхи ăмăртусем вара ял-йыша вăй-хала çирĕплетме, чун-хавала ÿстерме май панă. Спорт тупăшăвĕсен кăтартăвĕсем çапларах: футбол чемпионĕ – шкул ачисен команди. Пионерболта чи вăйли – Г.Феофанова, А.Воробьева, И.Шашкова, В.Шашкована, Н.Шашкована тата А.Воробьевана пĕрлештерекен ушкăн. Велоспорт чупăвĕнче чи хăвăрттисем – Р. Алексеев, С.Ильин, С.Шашков, аслисенчен А.Кошкин, А.Алексеев, А.Фомин. 50 метра михĕпе сиксе А.Кошкин, В.Шашков, А.Себаков пуринчен малтан парăнтарнă. Ачасем 30 метр сикнĕ, чи маттуррисем – В.Шашкова, А.Воробьева, Н.Ильина. Çăмăл атлетикăра çамрăксенчен С.Ильин, С.Шашков, В.Шашкова тата Н.Васильева, аслисенчен Н.Кошкин, А.Артемьев, С.Себаков тата А.Андреев палăрнă.
Виççĕмĕш кунне ветерансемпе çамрăксем хушшинче иртнĕ футбол вăййи уйрăмах пурне те тыткăнланă. Матч иккĕмĕшсем майлă 8:4 шутпа вĕçленнĕ.
Çĕнтерÿçĕсенчен никам та парнесĕр юлман. Йĕркелÿçĕсем çартан отпуска килнĕ Анатолий Кошкинăн спортри ăсталăхне уйрăмах пысăк хак панă, вăл çитĕнекен ăрушăн ырă тĕслĕх пулнине палăртнă.