22 мая 2008 г.
Шыва кĕмелли сезон пуçланиччен нумай та юлмарĕ. Çулталăкăн çак тапхăрĕ сывлăха çирĕплетмелли чи лайăх вăхăт. Анчах хĕвел хĕрÿ хĕртме тытăнсан, тÿрех шыв еннелле туртăнма ан васкăр. Шывăн температури 18 градусран аяларах пулмалла мар. Чи малтанхи кунсенче пĕр хутчен кăна шыва кĕмелле. Выçăлла е апат çинĕ хыççăн 1–1,5 сехет иртмесĕр юрамасть. Шывра нумай вăхăт («кăвакарса кайиччен») ишме кирлĕ мар.
Ачасене 3–4 çултан тытăнсанах юханшывра е пĕвере шыва кĕртме юрать. Шкул çулĕчченхисене чи пĕрремĕш хут шывра 2–3 минутран, шкулта вĕренекен ачасене 3–5 минутран ытлашши тăратмалла мар. Каярахпа процедура вăхăтне 10–15 минутчен тăсма пулать. Ача-пăчана шывра ытларах хускану тутармалла. Енчен те ачана шăнтса пăрахнине асăрхасан васкасах ăна шывран кăлармалла, ÿт-тирне хĕреличчен типĕ ал шăллипе сăтăрмалла, тум-тир тăхăнтартса чупмалли вăйăсем выляттармалла. Шыва кĕрекенсен асăрханулăх çинчен нихăçан та манмалла мар. Мĕншĕн тесен çулла путса вилекенсен йышĕ уйрăмах ÿсет. Çавăнпа ашшĕ-амăшĕсен питĕ тимлĕ пулмалла, хăйсен тĕпренчĕкĕсене çитĕннисемсĕр юхан шыв е пĕве патне ямалла мар. Ачасене пĕчĕкренех ишме вĕрентмелле.
Кашнийĕн путакана пĕрремĕш пулăшу пама пĕлмелле. Инкеке лекнĕ ачана шывран туртса кăлармалла. Ĕçсе тултарнă шыва сывлав çулĕсенчен тата вартан кăларма пулăшу параканăн хăйĕн урине хуçлатса унта инкек тÿсекене хырăмпа выртармалла. Унтан çăвар хăвăлне хăйăртан, лĕкĕртен тасатса ачана çурăм çине хумалла, пуçне хыçалла ямалла, çăвартан сывлăш пама тытăнмалла. Тата çакна асра тытни кирлĕ: путакана пĕрремĕш пулăшу парса больницăна илсе çитериччен е тухтăр киличчен унăн ал-урине массаж тусах тăмалла.