08 мая 2008 г.
Иртнĕ эрнере Чăваш ене космос паттăрĕсем – Раççей Геройĕсем Н.Бударин, С.Залетин, Совет Союзĕн икĕ хут Геройĕ В.Горбатко, Совет Союзĕн Геройĕ А.Березовой килсе кайрĕç. Çăлтăрлă делегаци йышĕнче çавăн пекех Вĕçев управленийĕн центрĕн пай пуçлăхĕ В.Шевяков, Патшалăх Думин депутачĕсем – бюджет комитечĕн председателĕн çумĕ С.Штогрин тата ветерансен ĕçĕсен комитечĕн членĕ И.Фахрутдинов, Канаш районĕнче çуралса ÿснĕ Раççей Геройĕ, авиаци генерал-лейтенанчĕ, ФСБ авиаци управленийĕн ертÿçи Н.Гаврилов пулчĕç. Хаклă хăнасем «Союз-12ТМ» экипажĕпе иртнĕ экспедици вăхăтĕнче тĕнче уçлăхĕнче пулнă Çветтуй Георгий Çĕнтерÿçĕ турăшне Шупашкарти «Байконур» микрорайонти часавая парнелерĕç.
Сумлă делегацие Н.Федоров Президент йышăнчĕ. Республика пуçлăхĕ тĕнче уçлăхне тĕпчес енĕпе тунă тава тивĕçлĕ ĕçсемшĕн тата Чăваш Республикин çирĕп аталанăвĕшĕн хастар ĕçленĕшĕн Патшалăх Думин депутатне Николай Михайлович Бударина Чăваш Республикин Хисеп грамотине парса чысларĕ.
Космонавтсем тата вĕсемпе пĕрле килнĕ ушкăн А.Николаевăн тăван ялĕнче – Шуршăлта – пулчĕç, ĕçтешĕн вил тăпри çине чечексем хучĕç, Космонавтика музейĕпе паллашрĕç.
Çĕнĕ Шупашкарта Раççей Геройĕн Бударин космонавтăн призĕсене çĕнсе илессишĕн боксерсен турнирĕ иртрĕ.