06 мая 2008 г.
«Тĕлĕнтермĕш шашкăсем» енĕпе 20 çулчченхи çамрăксем хушшинче иртнĕ Чăваш ен чемпионатĕнче Вăрнар районĕн шашка ăстисем каллех малтисен йышне кĕнĕ.
Вăрнарти 1-мĕш вăтам шкулта 5-мĕш класра вĕренекен Ирина Иванова 1995–1998 çулсенче çуралнисен ушкăнĕнче пурне те çĕнтерсе ылтăн призер пулса тăнă. Ăна Чăваш енĕн пĕрлештернĕ команди йышне илнĕ. Сентябрь уйăхĕнче унăн сумлăрах ăмăртăва – Адлер хулинче иртекен Раççей турнирне – хутшăнма тивĕ.
Çавăн пекех харпăр хăй ÿсĕмĕнче ку шкулта вĕренекен Майкл Петров – иккĕмĕш, Степан Прохоров – виççĕмĕш, Юрий Антипов тăваттăмĕш вырăн йышăннă.
Команда тренерĕ Григорий Степанов ăмăтăва тухма пулăшнăшăн район администрацийĕн вĕрентÿпе çамрăксен политикин пайне тав тăвать.
Умра – «Тĕлĕнтермĕш шашкăсен» Раççей первенстви. Çĕнтерес шанăçĕ пысăк пулнине кура, район командине унта та кайма пулăшасчĕ.
Май уйăхĕн 1-мĕшĕнче ачасемпе çамрăксен районти пултарулăх çуртĕнче те шашка турнирĕ иртрĕ. Йĕркелекенĕ – шашка енĕпе СССР спорт мастерĕ Валерий Наумов. Унта республикăри паллă шашистсем, спорт мастерĕсемпе кандидачĕсем хутшăнчĕç.
Пирĕн районтан партисенче турнир пуçаруçи В.Наумов хăй, çамрăксенчен И.Ивановапа А.Иванов вылярĕç. Малти вырăнсене çак шашистсем пайларĕç: Н.Дмитриев (Вăрнар), В.Малов (Шупашкар), А.Косарев (Тăвай).