06 мая 2008 г.
Чăваш патшалăх филармонийĕнче «Мехел» чăваш эстрада юррисен республикăри иккĕмĕш ача-пăча конкурсĕн çĕнтерÿçисен гала-концерчĕ иртрĕ. Пирĕн районтан унта ÿнер шкулĕн вĕренекенĕ Ирина Стешко хутшăнчĕ.
Ирина чылай конкурс-фестивальсенче палăрнă, эстрада юррисен регионсем хушшинчи «Вирьял шевлисем» конкурсра «Хальхи вăхăтри вокал» номинацире призерсен йышне кĕнĕччĕ.
«Мехел» конкурс Иринăшăн пысăк сценăна уçакан çул пулчĕ. Вăл 14–17 çулсенчи ушкăнра «Соло» номинаци çĕнтерÿçи пулса тăчĕ. Çавăн пекех SMS-сасăлавпа вăл куракансен кăмăлне те çĕнсе илчĕ.
Ирина кăçал ÿнер шкулĕнчен вĕренсе тухать. Шупашкарти Ф.Павлов ячĕллĕ музыка училищине вĕренме кĕрес ĕмĕтлĕ.
«Август» фирма «Вăрнарти хутăш препаратсен завочĕ» АУО-н филиалне конкурса кайма автобус уйăрса панăшăн чĕререн тав тăватпăр.