26 апреля 2008 г.
Çамрăк космонавтсен юхăмĕ республикăра вăй илсех пырать. Халĕ вăл 50 отрядри 700 ытла ачана пĕрлештерсе тăрать.
Нумаях пулмасть республикăра çамрăк космонавтсен слечĕ иртрĕ. Унта Мăн Явăшри вăтам шкулти «Сириус» отряд та хутшăнчĕ. Малтанах митинг Шуршăлти Космонавтика музейĕ умĕнче пуçланчĕ. Унтан ачасем Шупашкара çул тытрĕç. Отрядсем шкулсем тăрăх саланса вĕренекенсемпе тĕл пулчĕç, хăйсемпе паллаштарчĕç, викторина ирттерчĕç. Кунта пирĕн отрядри Лилия Владимирова бортинженер, Лилия Казакова инструктор палăрчĕç.
Унтан слетăн тĕп пайĕ Ачасемпе çамрăксен пултарулăх керменне куçрĕ. Çамрăк космонавтсем çулталăкра пурнăçланă ĕçсене пĕтĕмлетрĕç.
Лилия Владимирова Мускавра иртекен «Космос» конкурса хутшăнма пултарчĕ. Шкулти чи хастар çамрăк космонавтсем Н.Никифоровпа И.Арсентьев «Байконур» космодромра пулса курчĕç. «Союз – ТМА-12» космос карапĕ уçлăха епле çĕкленнине тимлĕ сăнарĕç. Вĕсемшĕн ĕмĕр манăçми телейлĕ самант пулчĕ.
Республикăра ирттернĕ тата ытти конкурссене шута илсе «Сириус» чи лайăх отряд ятне çĕнсе илчĕ. Çĕнтерÿçĕ отряда ЧР Вĕрентÿ тата çамрăксен политикин министрĕн çумĕ С.В.Петрова ăшшăн саламласа вĕренÿре ăнăçусем сунчĕ, дипломпа тата кубокпа чысларĕ. Ку чăннипех те питĕ пысăк çитĕнÿ пулчĕ.
Тăван шкула ачасем ăшă та тулли кăмăлпа таврăнчĕç. Малашне те малтисен ретĕнче пыма сăмах пачĕç.