23 июня 2017 г.
Иртнĕ эрнере Муркаш районĕнче шкул лесничествисен республикăри слечĕ иртнĕ. Вăрнар район чысне унта хальхинче те Пăртас шкулĕнчи Вăрнарти ача-пăча пултарулăх çурчĕн филиалĕн «Лесной дозор» команди хÿтĕленĕ.
Çамрăк вăрманçăсем зоологи, ботаника, гидробиологи, вăрман ĕçĕ енĕпе пĕлĕве тĕрĕсленĕ, çавăн пекех «Вăрман ÿсентăранĕсен экологийĕ» тĕпчев ĕçне хÿтĕленĕ.
Слета уçнă чухне Пăртас ачисен командине тивĕçлĕ миссие пурнăçланă – вĕсем хăйсен агитаци программине кăтартнă.
Виçĕ кунхи тупăшусенче «Лесной дозор» командăна призлă вырăна лекме темиçе балл çеç çитмен. Анчах та София Захаровапа Валентина Сергеева хăйсен ĕçне ăнăçлă хÿтĕленĕ, иккĕмĕш вырăн йышăннă. Стена хаçачĕ кăларассипе команда виççĕмĕш пулнă.
Светлана ЧИКМЯКОВА.