23 июня 2017 г.
Çĕрпÿ районĕнче çамрăк армеецсен «Зарница» тата «Орленок» вăййисен республикăри финалĕ иртнĕ. Унта Чăваш енри 800 ытла шкул ачипе студент хутшăннă.
Вăрнар район чысне виçĕ команда – Вăрнарти 2-мĕш вăтам шкул, ял хуçалăх техникумĕн тата Хапăсри шкул командисем – хÿтĕленĕ. Вĕсем теорипе практикăна çыхăнтаракан 15 конкурс витĕр тухнă.
Пĕтĕмĕшле кăтартупа професси пĕлĕвĕ паракан вĕренÿ организацийĕсем хушшинче ял хуçалăх техникумĕн команди 3-мĕш вырăн йышăннă. «Зарницăра» 2-мĕш шкул ачисем 27 командăран 7-мĕш пулнă.
«Орленокра» Хапăс ачисем 24 командăран 11-мĕш вырăна тухнă пулин те туристсен полосине çĕнессипе 1-мĕш вырăн йышăннă.
– Кăтартусем аван. Командăсем çарпа патриотизм юхăмне аталантарассипе аван ĕçленине çирĕплетсе пачĕç. Пĕтĕмĕшле, районта ку енĕпе пур вĕренÿ организацийĕнче те аван тăрăшаççĕ, – терĕ район администрацийĕн вĕрентÿпе çамрăксен политикин пайĕн пуçлăхĕ Маргарита Тихонова.