20 мая 2017 г.
Районта çак эрнере çамрăк армеецсен «Зарница» тата «Орленок» вăййисем иртрĕç.
Виçĕ кунра шкулсенчи 21 команда вунă ытла конкурсра – вăй-хал гимнастикинче, Тăван çĕршыв историне пĕлессинче, стройпа утассинче, чăрмавлă турист çулне çĕнессинче, космоса тĕпчессинче, Калашников автоматне сÿтсе пуçтарассинче, чрезвычайлă лару-тăрура хăйсене тытма пĕлессинче тата ытти те – вăй виçрĕç.
Çамрăк армеецсене вăйăсем пуçланас умĕн район администрацийĕн пуçлăхĕ Леонид Николаев, вĕрентÿпе çамрăксен политикин пайĕн пуçлăхĕ Маргарита Тихонова, полицин «Вурнарский» пайĕн ГИБДД уйрăмĕн пуçлăхĕ Владимир Петров саламланă.
Шкул командисем кăçал та илемлĕ вырăнта – Кĕçĕн Çавал хĕрринче – вырнаçнă. «Виççĕмĕш çул хутшăнатпăр. Çак вăйăсем пире хăюллăрах, çивĕчрех, тавракурăмлăрах пулма, уй-хир условийĕсенче пурăнма вĕренме пулăшаççĕ», – пĕлтерчĕç Аçăмçырминчи шкулта вĕренекенсем. Ытти çулсенче вĕсем пĕтĕмĕшле зачетра малти вырăнсене йышăнатчĕç. Кăçалхи кăтартусем те япăх мар, ачасем чылай конкурсра палăрнă.
Пĕтĕмĕшле кăтартусемпе вара кăçал «Зарница» ушкăнра Вăрнарти 2-мĕш шкул çĕнтерÿçĕ пулса тăнă. «Орленоксен» ушкăнĕнче – Хапăсри вăтам шкул команди.
Светлана ЧИКМЯКОВА.