15 апреля 2017 г.
Пирĕн хушăра пултаруллă çынсем сахал мар. Вĕсем темĕнле кивĕ япалана та «чун» кĕртме пĕлеççĕ. Çакă тухса пăрахма шел вăл е ку предмета сыхласа хăварма май парать çеç мар, çутçанталăка варалассинчен те хăтарать.
Вăрнарти хутăш препаратсен заводĕнче акă çакнашкал эксклюзивлă ĕçсен «Творец-молодец!» конкурс-куравне пĕтĕмлетрĕç. Мĕнрен кăна ăсталаман пулĕ экспонатсене; Кивĕ хаçатсем, çипсем, тĕркемсем, тимĕр банкăсем, сехетсем, пластмасс изделисем... – пĕтĕмпех ĕçе кĕнĕ. Уйрăмах гайкăсенчен, болтсемпе ытти металл предмечĕсенчен хатĕрленĕ мотоцикл, танк, робот, этем кĕлеткисем, шăчă çинче ташлакан хĕр... питĕ тыткăнлать. Ку çыннăн – ЦПО ĕçченĕн Дмитрий Павловăн фантазийĕ те пысăк, аллисем те ылтăн. Вăл конкурс пĕтĕмлетĕвĕпе малти вырăна тухаймарĕ пулин те ун ĕçĕсемпе завода килекен кашни çын кăмăлласа паллашрĕ.
«Кивĕ япаласен иккĕмĕш пурнăçĕ» номинацире Василий Малов укладчик-упаковщикăн тимĕр банкăсенчен эрешлесе ăсталанă сĕтел-пуканĕсем мала тухрĕç. Иккĕмĕш вырăнта – пушар хуралĕн пайĕн водителĕн Вадим Волковăн хаçат трубочкисенчен хатĕрленĕ пушмакĕ. Виççĕмĕшĕнче – Алексей Матвеев, вăл кивĕ будильниксемпе компьютер платинчен ÿсентăрана хÿтĕлекен робот ăсталанă. Пĕр аллинче – канистра, тепринче чечексене хÿтĕлекен зонт.
«Пирографи. Йывăçран касса кăларасси» номинацире чи маттурри Сергей Никитин наладчик. Вăл йывăç касăкĕ çинче Менделеев сăнне ĕнтсе кăларнă. Иккĕмĕшĕнче – Александр Александров слесарĕн кĕнеке-шкатулка çинче касса кăларнă этем сăнĕ. КИПиА слесарĕ Юрий Матвеев ĕнтсе ÿкернĕ «От угля к газу» ĕçĕ виççĕмĕш вырăн йышăнчĕ.
Конкурс-курава заводăн çамрăк ĕçченĕсен канашĕ йĕркеленĕ. Çĕнтерÿçĕсене вăл тавар туянмалли сертификатсемпе, хутшăнуçăсене асăнмалăх парнесемпе чысларĕ.
Светлана ЧИКМЯКОВА.