08 апреля 2017 г.
Виçĕмкун Вăрнарта Чăваш Республикин патшалăх влаç органĕсен тата вырăнти хăйтытăмлăх ĕçченĕсен XVI спартакиади йĕркипе çуркуннехи тапхăрăн зонăри ăмăртăвĕсем иртрĕç.
Программăра – сĕтелçи теннис, шахмат, шашка тата стрит-баскет вăййисем. Финала тухассишĕн Сĕнтĕрвăрри, Шупашкар, Канаш, Вăрмар, Куславкка, Вăрнар, Çĕрпÿ районĕсен, Шупашкар тата Çĕнĕ Шупашкар хулисен администрацийĕсен командисем тупăшрĕç.
Ăмăртусем умĕн вĕсене культура, национальноçсен ĕçĕсен, физкультурăпа спорт пайĕн пуçлăхĕ Ирина Алексеева саламларĕ, Вăрнар çĕрĕ çинче çитĕнÿсем тума ăнăçу сунчĕ. Влаç представителĕсене «Рассвет» ача-пăча спорт шкулĕн Светлана Мальцева ертсе пыракан фитнес-аэробика ушкăнĕ те савăнтарчĕ.
Хĕрÿ вăйăсем харăсах темиçе площадкăра иртрĕç. Физкультурăпа спорт комплексĕнче патшалăх служащийĕсем стрит-баскетра тата сĕтелçи теннисра тупăшрĕç. Пĕрремĕш тĕсре вăрнарсен чысне Денис Константинов, Алексей Владимиров, Юрий Бурмистров, Игорь Иванов, Татьяна Федорова хÿтĕлерĕç. Ракеткăпа ăста выляканĕсем – Людмила Канькина, Сергей Николаев тата Сергей Политов. Шашка ăстисем – Вячеслав Алексеев, Виталий Федоров тата Людмила Трофимова, шахматпа – Валерий Наумов.
Шел те, ку тĕссенче вăрнарсем спартакиада финалне тухаймарĕç. Сĕтелçи теннисра 3-мĕш, шашкăра 4-мĕш, шахматра 5-мĕш пулчĕç вĕсем. Стрит-баскетра маларах кăна ăнăçрĕ.
Шупашкар хула администрацийĕн команди вара пур тĕсре те пĕрремĕш пулчĕ. Çавăн пекех финалра Канаш, Шупашкар тата Куславкка районĕсем тупăшĕç.