25 марта 2017 г.
Эпĕ ватă çын. Питĕ кирлĕ чухне кăна килтен тухатăп. Хальхинче электроэнергишĕн тÿлеме почтамта çитмелле пулчĕ. Киле таврăннă май, «Санар» лавккана апат-çимĕç туянас тĕллевпе кĕтĕм. Касса умне çитнĕ çĕре манăн карçынкка самаях йывăрланнине туйрăм. Киле мĕнле йăтса çитересси шухăша ячĕ. Кама та пулин пулăшма ыйтма шутларăм, анчах паллакан пĕр çын та курăнмарĕ. Аптранă енне кассир патне пытăм, сирĕн мана пулăшма пултаракан çын çук-ши, терĕм. «Шел, нимĕнпе те пулăшаймастпăр», – пулчĕ хурав.
Кăштах вăхăт иртсен ман ума илемлĕ тумланнă икĕ хĕрача пырса тăчĕç. «Сире пулăшмалла мар-и?» – ыйтрĕ пĕри. Савăнсах кайрăм, çак сумккăна киле илсе çитерме пулăшсан тем пекехчĕ, терĕм. Пулăшнăшăн укçа та пама шантартăм. Хĕрсен пичĕсем кулăпа йăл çиçрĕç, пулăшма шантарчĕç, анчах эпир укçа илместпĕр, терĕç. Пĕри сумккăна алла илчĕ, тепри мана хулран тытрĕ. Калаçса пынă май хĕрсем Вăрнарти техникумăн кулинари уйрăмĕнче пĕрремĕш курсра вĕреннине пĕлтĕм. Светлана – Вăрнар районĕнчен, Наташа – Йĕпреç тăрăхĕнчен. Вĕсем сумккăна хваттер умне, иккĕмĕш хута, çитерсе пачĕç. Ырă кăмăллă хĕрсене чей ĕçме хăнана чĕнтĕм, анчах килĕшмерĕç. Вĕсене хама пулăшнăшăн чĕререн тав турăм.
Светланăпа Наташа пек çамрăксене час-часах тĕл пулатăп: ăçта та пулин кĕнĕ е тухнă чухне алăка тытса иртме пулăшаççĕ, автобусра вырăн параççĕ.
Эпĕ çакăн пек çамрăксен ашшĕ-амăшне те тав тăватăп. Вĕсем хăйсен ачисене ватăсене хисеплеме-пулăшма, килти чĕрчунсене юратма хăнăхтарса çитĕнтернĕ. Ырă чунлă хĕрачасемпе арçын ачасене çирĕп сывлăх, вĕренÿре, ĕçре ăнăçу, телей сунатăп.
Ольга ЧЕРНОВА,
педагогика ĕçĕн ветеранĕ.