22 марта 2017 г.
Вăрнарти «Кристалл» хоккей команди (2002 – 2004 çулсенче çуралнисем) Чăваш Республикинчи «Золотая шайба» турнирта 2-мĕш вырăн çĕнсе илсе клюшкăсене тата 50 пин тенкĕлĕх сертификата, çавăн пекех Краснодар тăрăхне Раççейри «Золотая шайба» турнира кайма тивĕç пулчĕç.
Командăра Вăрнарти 2-мĕш тата 1-мĕш вăтам шкулсенчи ачасем: Ростислав Петров, Андрей Афанасьев, Николай Яковлев, Михаил Анисимов, Иван Васильев, Павел Головин, Евгений Степанов, Дмитрий Иванов, Кирилл Ефремов, Максим Федоров, Мария Трякова, Данил Лукин, Кирилл Никитин, Дмитрий Никитин.
Раççейри турнир февралĕн 11–19-мĕшĕсенче иртрĕ. Ачасем малти вырăна лекеймен пулин те хăйсене лайăх енчен кăтартнă. Çамрăк хоккеистсемпе пĕрле тĕп тренер Николай Павлович Старостин тата вăхăтлăх тренер Валерий Михайлович Якимов пулнă. Вĕсене ашшĕ-амăшĕсенчен пысăк тав. Ачасем вăйлă командăсемпе тĕл пулнă, хăйсен йăнăшĕсене тÿрлетме вĕсенчен тĕслĕх илнĕ. Çамрăксене малашне те тăрăшса выляма тата çитĕнÿсем туса пыма сĕнетпĕр.
Эпир, ашшĕ-амăшĕсем, ачасем спортпа туслă пулнишĕн питĕ хĕпĕртетпĕр. Анчах та пире пĕр ыйту питĕ хумхантарать. Ачасен тренерĕсем вăхăтлăх кăна. Çавна пăхмасăрах вĕсем кашни кунах тренировкăсене çÿреме хатĕр. Ачасемпе ытларах ĕçлесен, вĕсем тата çÿллĕрех шая çĕкленмелле. Эпир, ашшĕ-амăшĕсем, район пуçлăхĕсенчен пулăшу ыйтатпăр.
Ашшĕ-амăшĕсем.