11 марта 2017 г.
«Янгорчино» ял хуçалăх производство кооперативĕнче отчет пухăвĕ пулчĕ. Унăн ĕçне район администрацийĕн ял хуçалăхĕпе экологи пайĕн пуçлăхĕн çумĕ В.Шашкин хутшăнчĕ.
Хуçалăх ертÿçи Г.Романов иртнĕ çулта йывăрлăхсем сахал мар пулнине, çавах та, çанталăк условийĕсене пăхмасăрах, палăртнă тĕллевсене пурнăçа кĕртме пултарнине палăртрĕ. 2016 çулта тĕштырăсене кашни гектартан 31 центнер пухса илнĕ. Выльăх-чĕрлĕхе хĕл каçарма апат çителĕклĕ хатĕрленĕ. Сăвăм кăтартăвĕ те пĕчĕк мар.
Ял хуçалăх производство кооперативĕн специалисчĕсем пĕлтĕрхи ĕçсене пĕтĕмлетрĕç. Кăçалхи тĕллевсене уçăмлатрĕç. Кăçал акмалли лаптăксене пĕчĕклетрĕç: тĕштырă культурисем 660 гектар, çĕрулми 50 гектар йышăнĕç. Ĕç тухăçне ÿстерес тĕллевпе МТЗ трактор тата сеялкăпа культиватор туянма пăхнă.
Çĕрпел ял тăрăхĕн пуçлăхĕ Л.Федорова ялсенчи урамсене тирпей-илем кĕртес ыйтăва çĕклерĕ, çурхи ейÿ вăхăтĕнчи ĕçсене палăртрĕ.
Район администрацийĕн ял хуçалăхĕпе экологи пайĕн начальникĕн çумĕ В.Шашкин пухăннисене ял хуçалăх отраслĕн кăтартăвĕсемпе паллаштарчĕ.
К.ЮРЬЕВ.