11 марта 2017 г.
Ачасемпе çамрăксен спорт шкулĕн йĕлтĕрçисем февралĕн 23-мĕшĕпе мартăн 8-мĕшĕчченхи тапхăрта виçĕ ăмăртура вăй виçнĕ.
Канаш районĕнче иртнĕ «Хучель йĕлтĕр йĕрĕнче» Мăньял Хапăсри пĕртăван Тикиневасемпе Кив Сăрьелĕнчи Зайцевасем çĕнтерÿ пьедесталĕ çине хăпарма тивĕçнĕ. Кĕçĕн хĕрачасем хушшинче Настя Тикинева дистанцие пĕрремĕш вĕçленĕ, ун аппăшĕ, Валентина, – иккĕмĕш. Аслăрах ÿсĕмри хĕрсем хушшинче Зоя Зайцева пĕрремĕш, Лена Зайцева виççĕмĕш пулнă.
Шкул ачисен спартакиади йĕркипе Чăваш ен Пуçлăхĕн Кубокĕшĕн иртнĕ йĕлтĕр финалĕнче те хĕрсем Вăрнар ятне çÿле çĕкленĕ.
Пĕтĕмпе чупăва районти 20 енне спортсмен хутшăннă. Ирĕклĕ стильпе Настя Тикинева 2-мĕш, Валентина Тикинева 3-мĕш вырăнсене йышăннă. Классикăра Настя – ылтăн, Валентина кĕмĕл призер. Хапăсри Владимир Скворцов, Шăхальти Юрий Петров вунă чи вăйлă спортсмен йышне кĕнĕ.
Спорт шкулĕсем хушшинчи Чăваш Республикин первенствине Юрий Тикинев тата Михаил Павлов тренерсен вĕренекенĕсем 18-ăн хутшăннă.
Аппăшсем – Тикиневасем каллех чи маттуррисем пулнă. Ирĕклĕ стильте Настя 1-мĕш, Валентина 3-мĕш* классикăра Валентина 1-мĕш, Настя 2-мĕш пулнă. Уйрăм чупура Хапăсри Михаил Скворцовпа Çĕрпелти Юрий Сергеев та япăх мар ăмăртнă, анчах призлă вырăна лекеймен.
Эстафетăра та палăрнă Вăрнарăн çамрăк йĕлтĕрçисем. Кĕçĕнреххисен ушкăнĕнче Валентинăпа Настя Тикиневасем, Михаил Скворцов тата Юрий Петров иккĕмĕш результат кăтартнă.
Халĕ йĕлтĕрçĕсем «Çурхи тумлам» республика ăмăртăвне тата Первоуральскра «Пионерская правда» хаçат парнисемшĕн пулакан Раççей чупăвне кайма хатĕрленеççĕ.
Светлана ЧИКМЯКОВА.