11 марта 2017 г.
Пĕтĕм тĕнчери хĕрарăмсен кунĕнче полицин «Вурнарский» пайĕн ГИБДД уйрăмĕн ĕçченĕсем – Владимир Петров пуçлăх тата Стас Семенов инспектор – пархатарлă «роле» пурнăçларĕç: районти хĕрарăм-водительсене ялкăшакан тюльпансен тата хризантемăсен çыххисемпе савăнтарчĕç.
Машинисене чарса документсене ыйтсан автоледисен сăнĕнче малтанах хумхану туйăмĕ палăрчĕ. Анчах та ГИБДД сотрудникĕсен аллинчи чечексене курсан вĕсем йăл та йăл кулма тытăнчĕç.
Руль умĕнчи пикесене, паллах, çак шухăш килĕшрĕ, патшалăх автоинспекторĕсене ырă акцишĕн кашниех тав турĕ.
Владимир Петровпа Стас Семенов хăшпĕр пассажирсемпе çуран çÿрекенсене те савăнтарчĕç, чечек çыххисем тыттарчĕç, пурне те çурхи кăмăл, çулсем çинче асăрхануллă пулма сунчĕç.
Светлана ЧИКМЯКОВА.