07 марта 2017 г.
Районти вĕрентÿ организацийĕсенче аякри хуласенчен килнĕ вĕрентекенсем чылайăн ĕçлеççĕ. Вăрнарти 2-мĕш вăтам шкулта биологипе химие вĕрентекен Вера Алексеевна Золина акă пирĕн тăрăха Чулхула облаçĕнчен килсе лекнĕ.
Аслă пĕлĕве, биологипе химик специальноçне, Шупашкарти И.Я.Яковлев ячĕллĕ Чăваш патшалăх институтĕнче илнĕ. Направленипе Хапăсри шкула килнĕ. Çичĕ çул, 1977 – 1984-мĕшĕсенче, хăйĕн профессийĕпе ĕçленĕ. Класс тулашĕнчи воспитани ĕçĕн организаторĕ, пĕр вăхăт шкул директорĕ пулнă.
1984 çулта КПСС Вăрнар райкомĕн пропагандăпа агитаци пайĕн инструкторне куçнă, 1991 çулччен пĕрремĕш секретарь пулăшуçинче тимленĕ.
Кайран каллех юратнă ĕçĕ патне таврăннă. Кив Мĕлĕшри шкулта биологипе химие вĕрентме тытăннă. Директор заместителĕнче тăрăшса ĕçленĕ.
Халĕ 21 çул ытла ĕнтĕ Вăрнарти 2-мĕш вăтам шкулта вăй хурать. Унăн предмечĕсене вĕренекенсем хытă юратаççĕ, наукăпа практика конференцийĕсене час-часах хутшăнаççĕ, призлă вырăнсене çĕнсе илнисем те сахал мар.
Çак çитĕнÿсем Вера Алексеевна ачасемпе пĕр чĕлхе тупма пĕлнипе, хăйĕн ĕçне чунтан парăннипе çыхăннă ĕнтĕ. Унăн курăмлă ĕçне тăватă çул каялла Раççей Федерацийĕн Вĕрентÿпе наука министерствин Хисеп грамотипе хакланăччĕ. Ытти наградăсем те чылай.