04 марта 2017 г.
Кĕçнерникунпа эрнекун Шупашкарти «Экспо-Контур» суту-илÿпе курав комплексĕнче регионсен хушшинчи IX «Çĕрулми-2017» отрасль выставки ĕçленĕ.
Унта республикăра тата ун тулашĕнче «иккĕмĕш çăкăра» тата унăн вăрлăхне туса илекенсем, ăна тĕпчесе çитĕнтерме, пухса кĕртме, упрама сĕнÿсем хатĕрлекен институтсен, çĕрулми лартмалли, пăхса ÿстермелли, хиртен кĕртмелли техника, минерал удобренийĕсемпе хими им-çамĕ янтăлакан компанисен представителĕсем хутшăннă.
Республика Пуçлăхĕ Михаил Игнатьев экспозицисемпе паллашнă. Çĕрулмирен пĕçернĕ çимĕçе астивсе пахаланă.
Унта Вăрнар районĕнчи «Санары» тата «Семеновод» агрофирмăсем хăйсен пахалăхлă çĕрулми сорчĕсене тăратнă. Куравăн генеральнăй спонсорĕ – «Август» фирма, компани представителĕсем хăйсен экспозицийĕпе паллаштарнă.
Курава район администрацийĕн пуçлăхĕ Леонид Николаев тата унăн пĕрремĕш заместителĕ Вячеслав Горбунов хутшăннă.
«Çĕрулми-2017» вăхăтĕнче йĕркеленĕ суту-илÿре Вăрнар хуçалăхĕсен «иккĕмĕш çăкăрне» хапăлласа туяннă.