04 марта 2017 г.
Вăрнарти 2-мĕш шкулăн футбол командишĕн Атăлçи округĕнчи ăмăртăва хутшăнни калама çук пысăк чыс. Çак тивĕçе вĕсем «мини-футбол» шкул программипе республикăра палăрса çĕнсе илнĕ.
Чăваш ен чемпионĕсем Чулхула облаçĕнче иртнĕ турнирта та çивĕч вылянă. Ăмăрту хуçисене 3:0, Самар облаçĕн командине 1:0, Мари Эл ачисене 1:0 шутпа çĕнтернĕ. Мордови командипе вылянă чух тимлĕхе чакарни вара вĕсене призлă вырăна лекме паман. Хăйсен хапхине кĕрттернĕ пĕр мечĕк вĕсене 5-мĕш йĕркене антарнă. Кулянуллă, паллах. Анчах та ачасем хавала çухатмаççĕ – «çитес çул çĕнтеретпĕрех!» теççĕ.
Командăра – Дима Мошкин, Денис Павлов, Семен Павлов, Никита Михайлов, Дима Пчельников, Кирилл Герасимов, Стас Павлов, Андрей Васильев, Дима Германов тата Вениамин Федоров. Ачасене ăмăртăва Геннадий Герасимов, Александр Строганов тренерсем тата Дмитрий Игнатьев физкультура учителĕ хатĕрленĕ.
Çамрăк спортсменсем инçет çула тухма пулăшнăшăн Вăрнарти хутăш препаратсен завочĕн директорне Владимир Свешникова, район тĕп больницин тĕп врачне Николай Тинюкова, районти вĕрентÿ пайне, 2-мĕш шкул администрацине чĕререн тав тăваççĕ.
Светлана
ЧИКМЯКОВА.