04 марта 2017 г.
Пĕрлехи уявсем ял халăхне пĕтĕçтерес, вĕсен канăвне усăллă ирттерес ĕçре пысăк вырăн йышăнаççĕ. Çак ĕçе çамрăксем тÿпе хывни вара пушшех пĕлтерĕшлĕ.
Упнерте акă Антон Сергеев пуçарнипе Çăварние ăсатса ярас йăла мероприятине йĕркеленĕ. Пĕр шухăшлисем те тупăннă – Галина Макаровапа Вячеслав Тарасов пысăк пулăшу панă.
Кунашкал уяв Упнерте тахçанах пулманран-и, ял çыннисем йышлăн пуçтарăннă. Вăйăсенче – канат туртассинче, михĕсемпе кĕрешессинче, кире пуканĕ йăтассинче, вутă татассинче – хастар пулнă вĕсем.
«Туслăх» ушкăнăн юрри-кĕввине хапăлласа йышăннă. Тамара Семенова, Антонина Сергеева, Мария Кожанова, Галина Кудрявцева, Вера Кольцова, Любовь Семенова, Елена Романова артистсем унччен те культура мероприятийĕсене хастар хутшăннă. Халĕ, пĕрлехи ушкăна чăмăртаннă хыççăн, ял çыннисен вĕсен пултарулăхĕпе тăтăшрах паллашма май пулĕ.
Конкурса хутшăнакансем ZOOM фотоцентрăн Упнер ялĕн символикиллĕ сувенирĕсене, парнисене тивĕçнĕ. Ял çыннисем кунашкал уявсене малашне те ирттерес кăмăллине пĕлтернĕ.