04 марта 2017 г.
Вăхăт урхамахĕ мĕнле хăвăртлăхпа чупса иртнине сиссе юлма çук. Нумаях пулмасть Пăваялĕнчи культура çуртне çынсем чылаййăн пухăнчĕç. Кĕçĕн Кипек ял администрацийĕн пуçлăхĕ С.Волков пĕлтĕр мĕнле ĕçлесе пынипе паллаштарчĕ.
Пуху лăпкăн иртрĕ. Мĕншĕн тесен çакă ял администраци пуçлăхĕ халăхпа пĕр чĕлхе тупнипе тата ăна ăнланнипе çыхăннă. Ял тăрăхĕн пуçлăхĕ хăйĕн отчетĕнче пĕлтерĕшлĕ ыйтусене çĕклерĕ. Хуçасăр выртакан çĕрсене фермерсене арендăна панине, урамсенчи юпасене сахал энерги пĕтерекен лампăчкăсем лартнине пĕлтерчĕ. Çÿп-çап ыйтăвне çĕклерĕ, çавăн пекех пушар чаçне тытса тăма кашни килтен 300-шер тенкĕ пухмаллине каларĕ. Çил-тăман вăхăтĕнче çулсене лайăх тасатса тăнипе Пăваяль халăхĕ кăмăллă. Кайри Тукайри Виталий Максимов тасатнă иккен. Кăçал вара Игорь Сергеев фермер тăрăшулăх кăтартать. Ял администраци пуçлăхне кулленхи ĕçре пулăшакан çын кирлине палăртса Пăваялĕнчи Борис Семенова старостăна суйларĕç.
Районти пушар хуралĕн ĕçченĕ Алексей Иванов та тухса калаçрĕ. Инкекрен асăрханма ыйтрĕ. Район администрацийĕн ĕçченĕ С. Войтенко район ĕçĕ-хĕлĕпе паллаштарчĕ. 2016 çулта ирттернĕ ял халăх пухăвĕнче уйрăм хуçалăсем çĕр пайĕсене чикĕлессипе ĕçлеме Надежда Курсована уполномочченнăя суйланăччĕ. Ял халăхĕ унăн ĕçне ырларĕ.
Пухура ял администрацийĕн ĕçне вăтам хак пачĕç. Çăва тухсан тавралăха тирпей-илем кĕртес, Пăваялĕнче пĕр пĕвене тасатса пĕвелес, халăхран пухакан сĕт хакне пĕр шайра тытма тăрăшас тесе йышăнчĕç.
Юлашкинчен культура ĕçченĕсем хăйсен юрри-ташшипе савăнтарчĕç. Уйрăмах Туçи Çармăсра çуралса ÿснĕ Нина Иванова хăйĕн «Шăпа» сăввипе пурне те тыткăнларĕ.
Анна ПЕСКОВА.