01 марта 2017 г.
Вăрнар химикĕсем пысăк уява пухнине поселок çийĕн сарăлнă юрă-кĕвĕ ирех систерчĕ. «Химик» стадиона çитичченех уяв сĕмĕ çавăрса илчĕ. «Телей хапхи» витĕр тухакан, ахăртнех, кашниех çутă ĕмĕтпе çунатланчĕ. Химиксем Çăварни валли суйласа илнĕ лапамра вара пурнăçри çивĕч ыйтусене манса пуçĕпех уяв авăрне путатăн...
Вăрнарти хутăш препаратсен завочĕн ĕçченĕсем тĕрлĕ халăхсен, камитçĕ тумĕсене тумланни те, вĕсем халăх юррисен çемĕпе куракансене ташă çаврăмне явăçтарни те уяв савăнăçне ÿстерчĕç. Шăматкун ку предприятире ĕçлекенсем хăйсем хими промышленноçĕн лидерĕсем çеç мар, пултаруллă кулинарсем пулнине те кăтартса пачĕç. Стадионта йĕркеленĕ палаткăсенче вĕсем хатĕрленĕ апат-çимĕçпе сĕтелсем авăнса кăна тăчĕç. Чăваш чăкăчĕ те, пылĕ те, кукăль-пĕремĕкĕ, сиплĕ курăк чейĕсем... Чи пахи, паллах, Çăварни çимĕçĕ – икерчĕ. Ăна химиксем вăлчапа, тăпăрчăпа, пылпа, варенипе, хăймапа, çупа тутанса пăхма сĕнчĕç. «Миçе тенкĕ?» – кăсăкланчĕç тутлă шăршă илĕртнипе çынсем. Пачах тÿлевсĕр тесен вара тĕлĕнмеллипех тĕлĕнчĕç.
Чăн та, çакă предприятишĕн тăкаклă пулчĕ пулин те Вăрнар çыннисене химиксем тÿлевсĕр икерчĕпе, чейпе, ытти çимĕçпе сăйларĕç. Икерчĕсене чылай цех-подразделени ĕçченĕсем вырăнтах пĕçерсе тăчĕç. Чи кăсăкли – кăвайт умĕнче ытларах арçынсем хыпкаланчĕç. Чăн-чăн поварсем пекех ĕçлерĕç вĕсем – икерчĕсене сывлăшра вĕçтерсе çавăрчĕç.
Ку çеç те мар, чее чăн-чăн сăмаварсенчен ярса пачĕç. Вутăпа вĕретекенни уйрăмах нумайăшне кăсăклантарчĕ. Чăн-чăн музей экспоначĕ вĕт.
– Химиксем туслă ĕçлеме те, пĕрле канма та пĕлеççĕ, – терĕ «Август» Фирмăн Вăрнарти филиалĕн директорĕ Владимир Свешников пурне те лайăх кăтартусемшĕн тав туса.
Çак кун унăн социаллă тивĕçтерÿсен пайĕн пуçлăхĕпе Евгений Захаровпа пĕрле чи яваплă миссие пурнăçлама тиврĕ: хăш коллективăн икерчисем тутлăрах? Кашни палатка патĕнче чарăнчĕç вĕсем, кашнине тутлă çимĕçшĕн тав турĕç.
Çак вăхăтра Шупашкарти çÿллĕ пуканесен театрĕ ачасене тĕрлĕ вăйăра савăнтарчĕ. Кĕçĕннисем шăлаварсем тăхăнса та, шăпăр çине утланса та чупрĕç, михĕсемпе те «çапăçрĕç».
Заводăн кашни коллективĕ вара хаваслă конкурссенче вăй виçрĕ: чукуна ухватпа йăтса, кĕвентепе чупрĕ, çăматăсемпе лапталла вылярĕ, урапа кустăрмине хăма тăрăх ярăнтарчĕ, ăмăртмалла пăта çапрĕ, вутă татрĕ. Чи çивĕччисем шушкăсене тивĕçрĕç. Кашни шушки çĕнтерÿ балĕсене ÿстерсе пычĕ.
Шăпăрпа хоккей вылякансем куракансене уйрăмах йышлă пуçтарчĕç. Цехсен ĕçченĕсен такмакĕсем тата? Шÿтлĕ çаврасенче Свешников та, Захаров та тĕп сăнарсем пулса тăчĕç.
«Химик» стадионта Çăварни катемпийĕ тавра тăнă карта вара районта чи пысăкки пулчĕ, ахăртнех. Уяв «пики» те. Вăл виçĕ метр çÿллĕш, ун тумне çĕлеме 13 метр пусма кайнă. Унпа пĕрле цехсем уйрăмшар хатĕрленĕ катемписене те çунтарчĕç. Хĕрÿ çулăм кĕçех хĕвеллĕ çу – хĕрÿ те яваплă тапхăр çитессине систерчĕ.
Светлана ЧИКМЯКОВА.