22 февраля 2017 г.
Республикăри 8-мĕш хĕллехи ял спорт вăййисем Хĕрлĕ Чутай салинче иртрĕç. Вăрнар районĕн пĕрлештернĕ команди унта иккĕмĕш вырăн йышăнчĕ.
Ку çитĕнĕве пĕтĕмĕшле зачетри сакăр тĕсрен вăрнарсем çиччĕшĕнче сумлă тÿпе хыврĕç. Пĕрремĕш кунне виçĕ тĕсре çĕнтерÿ пьедесталĕ çине тăма тивĕçрĕç. Доярсен тупăшăвĕнче Ершепуç ял поселенийĕн команди – Галина Павловапа Александр Политов – пĕрремĕш вырăн йышăнчĕç. Механизаторсен конкурсĕнче пĕртăвансем – Эльвира Чугуновапа Владимир Тикинев – кĕмĕл призерсем пулса тăчĕç. Пĕрремĕшсем ĕне сумалли аппарата сÿтсе пуçтарнипе, иккĕмĕшсем груз кăкарнă тракторпа фигурăсем туса ярăннипе пĕрлех вăй-хал упражненийĕсенче те вăй виçрĕç.
Çемьесен старчĕ те темиçе тĕсе пĕрлештерчĕ. Мăньял Хапăсри Надеждăпа Юрий Тикиневсем тата вĕсен Валентина хĕрĕ дартсра та, йĕлтĕрпе ăмăртассипе те, мечĕке хоккей клюшкипе хапхана çапса кĕртессипе те, кĕвентепе шыв йăтассипе те, лаша кÿлессипе те чи маттуррисем пулчĕç – çĕнтерÿ пьедесталĕн чи çÿллĕ пусми çине хăпарчĕç.
Йĕлтĕрçĕсем – Николай Созонов, Александр Романов, Екатерина Герасимова, Ирина Петрова – пĕрремĕш кунне масс-стартра (хĕрарăмсем 5 км, арçынсем 10 км), иккĕмĕш кунне эстафетăра (3 тата 5 км) тупăшса пĕтĕмĕшле зачетра 4-мĕш вырăн йышăнчĕç.
Полиатлонистсем те – Сергей Политов тата унăн Сергей ывăлĕ, Диана Политова, Диана Борисова – тăваттăмĕш вырăнта.
Шашка енĕпе – Вячеслав Алексеев, Александр Григорьев, Светлана Чикмякова – саккăрмĕш, шахматла – Владимир Федоров, Александр Жилин, Мальвина Леонтьева – улттăмĕш пулчĕç.
500 ытла ял спортсменне ăмăртусем пуçланас умĕн Чăваш ен физкультурăпа спорт министрĕ Сергей Шелтуков, Чăваш ен Патшалăх Канашĕн председателĕн заместителĕ Николай Малов, ыттисем саламларĕç.