22 февраля 2017 г.
Мускаври «Сокольники» культурăпа кану паркĕнче В.И. Чапаев 130 çул тултарнине халалласа «Чапаевская лыжня» ятпа йĕлтĕрçĕсен ăмăртăвĕ иртнĕ.
Ăна çĕршывăн тĕп хулинчи чăваш наци культурин автономийĕпе Чăваш Республикин Раççей Президенчĕ çумĕнчи полномочнăй представительстви йĕркеленĕ. Спорт уявне Чапаевăн Аркадий мăнукĕ хăйĕн Александр мăнукĕпе пынă. Хăнасем хушшинче Раççей Геройĕ Николай Бударин, тĕнче чемпионĕсем Олег Захаровпа Сергей Корнилов тата ытти паллă ентешсем пуçтарăннă. Вĕсене Юрий Акиньшин саламланă.
VIP-ушкăнра пирĕн районти Мăн Явăшра çуралса ÿснĕ Эрик Васильевич Васильев полковник мала тухнă. Вăл финишра хăйĕнчен чылай çамрăкрах паллă биатлонистран Валерий Дмитриевран иртсе кайма пултарнă. Ăна Чапаев мăнукĕ Аркадий грамота тата медаль парса чысланă.
Валерий Кошкин.