15 февраля 2017 г.
Пĕтĕм Раççейри «Раççей йĕлтĕр йĕрĕ» массăллă старта хăшĕсем кăçал та çемйипех тухнине курма кăмăллă пулчĕ: Вăрнарти Романовсем, Федоровсем, Вăрманкасри Чугуновсем, Мăньял Хапăсри Тикиневсем, Шăхальти Петровсем...
Ашшĕ-амăшĕ ачисене те спортпа туслаштарнине ырламалла кăна. Катя Герасимова (Логачева) – ку тĕсе чунтан парăннă. Шкулта, техникумра вĕреннĕ вăхăтра йĕлтĕр спортĕнче, полиатлонра район чысне республикăра яланах çĕнтерÿллĕн хÿтĕлетчĕ. Маларахри çулсенче «Раççей йĕлтĕр йĕрĕнче» ун асламăшĕ Галина Степанова та дистанцие ним мар çĕнетчĕ. Кăçал Катьăн хĕрĕ те, Настя, чи кĕçĕннисемпе чупăва тухрĕ.
Стартсем пуçланиччен йĕлтĕр тусĕсене Чăваш Республикин Патшалăх Канашĕн комитет председателĕ Сергей Павлов саламларĕ. Вăрнарсене спортпа туслă пулнăшăн тав тунипе пĕрлех çитĕнÿсем патне ăнтăлмаллине те палăртрĕ. Чăвашсен тĕнче чемпионатĕнче çитĕнÿ хыççăн çитĕнÿ тăвакан биатлонистки Татьяна Акимова пек пулма ăнăçу сунчĕ, Чăваш енре спорт тĕлĕшĕнчен аталанма пĕтĕм майсем пуррине каларĕ.
Район администрацийĕн пуçлăхĕ Леонид Николаев та пухăннисене ăнăçлă старта йыхравларĕ.
Вăрнарсен хăйсен те йĕлтĕр спортĕнче çитĕнÿсем тăвакан ентешĕсемпе мухтанмалли пур. Хальхи ăрăвăн «çăлтăрĕсем» хамăр районтанах чылаййăн. Çĕн Сăрьелти Еленăпа Зоя Зайцевасем, Мăньял Хапăсри Иринăпа Валентина Тикиневасем акă çак кунсенче Чăваш ен чысне Раççей первенствинче хÿтĕлерĕç. Ытти çулсенче вĕсем «Раççей йĕлтĕр йĕрĕн» старчĕсенче яланах малтисем пулаканччĕ.
Массăллă чупăва хутшăнакансене Чăваш ен Патшалăх Канашĕн депутачĕ Сергей Павлов, район администрацийĕн пуçлăхĕ Леонид Николаев, унăн пĕрремĕш заместителĕ Вячеслав Горбунов, пай ертÿçисем, ведомствăсен, ял поселенийĕсен, предприяти-организацисен пуçлăхĕсем старта тухни хавхалану кÿчĕ.
Яланхиллех ветерансем, шкул ачисем хастар та йышлă пулчĕç. Кашни ÿсĕмри çĕнтерÿçĕне медальпе, дипломпа, ятарлă статуэткăпа тата «Раççей йĕлтĕр йĕрĕн» символикиллĕ шапкисемпе чысларĕç.
Кăçал пьедесталăн 1-мĕш пусми çине хăпарма тивĕçнисем çаксем: 2017 çулта çуралнисем тата кĕçĕнреххисем – Данил Попов (Калинино) тата Мария Гусева (Хапăс), 2005–2006 ç.ç. – Ирина Иванова тата Святогор Петров (Калинино), 2003–2004 ç.ç. – Юрий Петров (Аçăмçырми) тата Кристина Козлова (Вăрманкас), 2001–2002 ç.ç. – Галина Тикинева (Вăрнарти 1-мĕш шкул) тата Владимир Скворцов (Хапăс), 1999–2000 ç.ç. – Василий Чугунов (Вăрманкас) тата Алиса Федорова (Аçăмçырми), 19–30 çулхисем – Екатерина Герасимова (вĕрентÿ пайĕ) тата Александр Политов (Кÿстÿмĕр), 31–39 çулхисем – Эльвира Чугунова (ДЮСШ) тата Николай Созонов (Вăрнар), 40–49 çулхисем – Галина Павлова (ВСХТ) тата Владимир Тикинев (Мăньял Хапăс), 50–55 çулхисем – Эльвира Романова (Вăрнар) тата Борис Семенов (Пăваяль), 56–60 çулхисем – Маргарита Афанасьева тата Геннадий Медведев (Вăрнар), 61–65 çулхисем – Нина Кондратьева (Ярмушка) тата Евгений Алексеев (Упнер), 66–69 çулхисем – Михаил Илларионов (Ярмушка), 70 çултан аслăраххисем – Виталий Стеклов (Вăрнар).
Светлана ЧИКМЯКОВА.