11 февраля 2017 г.
Виçĕмкун Раççей Президенчĕ Владимир Путин тата Чăваш ен Пуçлăхĕ Михаил Игнатьев палăртнă Раççейри Экологи, Чăваш енри Амăшĕпе Ашшĕн çулталăкĕсене Вăрнар районĕнче те савăнăçлă самантра уçрĕç
Районти культура çуртне пухăннă тулли зала район администрацийĕн пуçлăхĕ Леонид Николаев саламларĕ. Сцена çинче сăмах иличчен вăл культура пайĕн пуçлăхĕпе Ирина Алексеевапа, районти культура çурчĕн директорĕпе Светлана Журавлевапа тата музей директорĕпе Елена Шариповапа учрежденин çĕнелнĕ залĕсемпе, иккĕмĕш хутра вырăн тупнă картинăсен куравĕпе киленсе паллашрĕ.
Профильлĕ çулталăка уçнине халалланă концерта вăрнарсем çĕнĕ креслăсем çине ларса пăхма пултарчĕç. Леонид Николаев вĕсене федераци центрĕн программипе тивĕçнине аса илтерчĕ, май уйăхĕ тĕлнелле, тен, маларах та, кунта киносем пăхма май пуррине палăртрĕ.
Иртнĕ Раççей Киновĕн тата Чăваш енри Ĕç çыннин çулталăкĕсене пĕтĕмлетнĕ май, вăл районта та ку тĕлĕшпе чылай мероприяти иртнине палăртрĕ. Пĕлтĕр район экономикин отраслĕсенче кăтартуллă тимлекенсене чылай чысланă. Леонид Григорьевич ентешсен ĕç династийĕсемпе тивĕçлипе мухтанма май пуррине палăртрĕ. Паллă ветеринари врачĕсен ăрăвĕ акă Пĕтĕм Раççейри конкурс çĕнтерÿçи пулса тăчĕ. «Август» Фирмăн «Вăрнарти хутăш препаратсен завочĕ» филиалĕнче темиçе ăру хими промышленноçне парăннисем чылай. Ял хуçалăхĕнче, вĕрентÿре, сывлăх сыхлавĕнче паллă династисем пур.
Кăçалхи çулсем те пĕлтерĕшлĕ. Слайдсенче улшăнса пыракан ÿкерчĕксем тăван тавралăха упрамаллине, çĕр çинчи чи çывăх çынсене хисеплемеллине кăтартрĕç.
– Пирĕн ачасене пĕчĕкрен тирпейлĕхе, тасалăха хăнăхтармалла, хамăр тĕслĕхпе çемье хаклĕхĕсене вĕрентмелле, – терĕ район администрацийĕн пуçлăхĕ Леонид Николаев.
Уяв районти культура çурчĕн, ача-пăча ÿнер шкулĕн, Светлана Мальцева, Зинаида Ижелеева, Ольга Варюхина ертсе пыракан ташă ушкăнĕсен, «Санар» фольклор ушкăнĕн, ветерансен хорĕн, Уравăшри культура çурчĕн, Вăрнарти 1-мĕш вăтам шкулăн ансамблĕсен, уйрăм юрăçсен – Лия Пелевинан, Валерия Григорьеван, Мария Нягинан илемлĕ номерĕсемпе пуянланчĕ.
Светлана ЧИКМЯКОВА.