11 февраля 2017 г.
Ярмушка ял тăрăхĕн пуçлăхĕ Алексей Петров халăх умĕнче пĕлтĕрхи ĕç-хĕле пĕтĕмлетсе отчет туса панă.
Ярмушка ял тăрăхне 8 ял кĕрет. Вĕсенче 2111 çын пурăнать. Пĕлтĕр ку тăрăхра 8 ача çуралнă, çав вăхăтра 33 çын çут тĕнчерен уйрăлса кайнă. Ярмушка тата Кушар Юнтапа ялĕсенче çул юсанă. Килсенчи çÿп-çапа пуçтарса тухма Вăрнарти «Водоканал» организаципе килĕшÿ тунă.
Район администрацийĕн пуçлăхĕ Леонид Николаев районта пĕлтĕр туса ирттернĕ ĕçсем çинчен каласа панă, ял çыннисен ыйтăвĕсене хуравланă.
Шупашкарти газ валеçекен акционерсен обществи Вăрнарти филиалĕн директорĕ Владислав Дубинин çутçанталăк газĕпе усă курнă чухне асăрхануллă пулмаллине ăнлантарнă. Ыттисем те тухса калаçнă. Кăçал тавралăха тирпей-илем кĕртесси, ашшĕпе амăшĕ çине пысăк тимлĕх уйăрмаллине каланă. Упа çырми урлă хывнă кĕпере юсас ыйтăва уçăмлатнă.
К.ЮРЬЕВ.