11 февраля 2017 г.
Районта пурăнакансене 127 çын тĕрлĕ культура мероприятийĕсемпе тивĕçтерет. Кашниех хăйĕн ĕçне чунтан парăннă, çавăнпа сценăран уйрăлма пултараймаççĕ. Иртнĕ çула илес пулсан, районта пурĕ 10302 мероприяти ирттернĕ, вĕсенчен 14 çула çитмен ачасем валли – 1963 мероприяти. Кану каçĕсене укçаллă тăвассине те йăлана кĕртнĕ. Планпа килĕшÿллĕн 400 пин тенкĕ ĕçлесе илмелле пулнă. 421,9 пин тенкĕ пуçтарнă. Укçаллă меропрятисене 27926 çын пырса курнă. 2016 çулта районта 332 клуб йĕркеленĕвĕ ĕçленĕ. Унта 3875 çын пырса çÿренĕ.
Ярмушкари «Шурăмпуç» фольклор коллективĕ (ертÿçи Надежда Лаврентьева), ветерансен халăх хорĕ (ертÿçи Валерий Шакртов), «Тивлет» халăх юрăпа ташă ансамблĕ (ертÿçи Алина Евдокимова), районти культура çуртĕнчи «Чаршав» халăх театрĕ (ертÿçи Галина Иванова), Чăрăшкас Хирлепри халăх театрĕ (ертÿçи Ольга Ефремова), «халăх коллективĕ» ята сыхласа хăварма пултарчĕç.
Вăрнарти историпе краеведени музейĕнчи çутçанталăк, этнографи тата курав залĕсем ĕçлеççĕ. Музей фондĕнче этнографи, археологи материалĕсем, ĕлĕкхи сăнÿкерчĕксем, документсем тата ытти те – паянхи кун 1516 экспонат ытла шутланать. Музей ачасемпе çамрăксене патриотизмла воспитани парса ÿстерессипе пысăк ĕçсем туса ирттерет. ,ç-хĕле Чăваш Республикин культурăн тава тивĕçлĕ ĕçченĕ Елена Шарипова ăнăçлă йĕркелесе пырать. Вăл тăрăшнипе пĕлтĕр 18 курав йĕркеленĕ, 121 тишкерÿллĕ тата тематика экскурси, 28 массăллă мероприяти ирттернĕ. Вĕсене 5010 çын пырса курнă.
Музей çумĕнче шкулта вĕренекенсен «Краевед» клуб пĕрлешĕвĕ ĕçлет. Ачасем шырав тата тĕпчев ĕçĕсем сахал мар туса ирттереççĕ. Ĕç çыннин çулталăкĕнче Çĕрпелте картинăсен галерейисен историйĕ çинчен видеофильм ÿкерчĕç.
Музейра район, Çĕрпелпе Канаш хулисенчи художниксен ĕçĕсенчен курав йĕркелесси йăлана кĕнĕ. Районти патшалăх хуралĕнче 5 археологи палăкĕ, 8 истори палăкĕ, 2 çутçанталăк палăкĕ тăрать.
2016 çулта республикăри патшалăх программипе килĕшÿллĕн Çĕрпелти культура çуртĕнче картина галерейине юсанă. Районти культура çуртĕнче электропроводка улăштарнă, пĕчĕк зала реконструкциленĕ, курав залне те çĕнетнĕ, çавăн пекех кинобудкăпа гардеробра та юсав ĕçсем ирттернĕ. Чăрăш Ишекре тата Çĕрпелте ăшă тытăмне улăштарма май килнĕ. Услантăр Енĕш клубĕнче, Хирпуç культура çуртĕнче, Кульцав культура учрежденийĕнче юсав ĕçĕсем тунă. Çавăн пекех картишне тирпей-илем кĕртес, чечексемпе хитрелетес тĕлĕшпе уйрăмах хастар ĕçленĕ.
Юрий КОРНИЛОВ.